У Запаляр'і адбыўся разліў 10 тон нафты
7- 8.06.2020, 20:35
- 24,339
Праз складаныя метэаўмовы гелікаптэр з адмысловымі службамі пакуль не можа прыбыць на месца аварыі.
У Ненецкай аўтаномнай акрузе адбыўся разліў 10 тон нафты, паведамляе «Интерфакс». Прычына - разгерметызацыя свідравіны Дзюсушаўскага радовішча, якую прызналі аварыйнай.
Адзначаецца, што праз складаныя метэаўмовы гелікаптэр з адмысловымі службамі пакуль не можа прыбыць на месца аварыі для ліквідацыі наступстваў разліву.
Вядома, што ліцэнзія на разведку і здабычу нафты на Дзюсушаўскім радовішчы належыць кампаніі «Палярнае ззянне». Яна зарэгістраваная ў Маскоўскай вобласці.
Раней праз уцечку паліва на Нарыльскай ЦЭЦ апынуліся забруджаныя рэкі Далдыкан, Амбарная, возера Пясіна і набліжэйшыя тэрыторыі. Агульная плошча забруджвання склала блізу 180 тысяч квадратных метраў.
Экспэрты заявілі пра найбуйнейшую ў расейскай Арктыцы экалагічную катастрофу. У забруджаных палівам вадаёмах у 200 разоў перавышаная гранічна дапушчальная канцэнтрацыя шкодных рэчываў. Нафтапрадукты прасачыліся ў глебу на глыбіню не менш за два з паловай сантыметры.
У Мінпрыроды тэрміны аднаўленне экалогіі пацярпелых зямель і вадаёмаў ацанілі ў 10 гадоў. Гендырэктар кампаніі «Нарыльскі нікель» Уладзімір Патанін заявіў, што для ліквідацыі катастрофы спатрэбіцца не менш за 10 мільярдаў рублёў.