Афіцэры з Лунінца: Мы - за мірную змену ўлады ў Беларусі

Вайскоўцы адварочваюцца ад «Сашы тры адсоткі».

Жыхары Лунінца масава падпісваліся за Святлану Ціханоўскую на пікетах 6 і 7 чэрвеня. Выданне media-polesye.by паразмаўляла з тымі, хто прыйшоў на легальныя пікеты за перамены.

Мы ўсёй сям'ёй прыйшлі да адзінага меркавання: так далей прадаўжацца не мусіць

- Вось прыйшла і мірна стаю ў чарзе, каб паставіць свой подпіс за таго кандыдата, у якога веру, - сказала Ніна Нагорная. - Я не майданутая, а беларусы – не народзец. У мяне цудоўныя выхаваныя дзеці, сын скончыў сельскагаспадарчую акадэмію ў Горках. Мы жывем паўнавартасным сямейным жыццём і жыццём сваёй краіны. Таму глядзім усе каналы, слухаем радыё і робім высновы. Мы - сур'ёзныя людзі і адказна ставімся да сваіх учынкаў. Тое, што я ў гэтай чарзе, не выпадкова. Мы ўсёй сям'ёй усё абмеркавалі і прыйшлі да адзінага меркавання: так далей працягвацца не павінна, змяняльнасць улады, тым больш такой, проста неабходная і даўно наспела. Так мяркуе ўся мая сям'я, родныя і ўсе, каго я добра ведаю.

Прыехалі адмыслова з вёскі

- Мы з дачкой-адзінаццацікласніца Дар'яй, прыехалі адмыслова з в. Азярніца, дзе пражываем, каб паставіць свае подпісы за Святлану Ціханоўскую і іншых альтэрнатыўных дзейнаму прэзідэнту краіны кандыдатаў, - сказала ў гутарцы з журналістам МП Вольга Трухановіч. - Муж пакуль заняты, але таксама падпішацца, як толькі вызваліцца з працы. Нам у горадзе не трэба было ні ў крамы, ні куды-небудзь яшчэ. Ехалі выключна для таго, каб подпісы паставіць.

Дар'я у Святланы Мікалаеўны - «група падтрымкі». Яна хоць яшчэ і занадта юная, але ўжо мае сваю грамадзянскую пазіцыю, кажа, што не прымае крывадушную ўладу і жахлівае хамства з яе боку. А сама яна ў школе была выдатніцай. Марыць паступіць у медыцынскі каледж. Стараецца паспяхова здаць іспыты і прайсці ЦТ.

Настолькі дапякла ўся гэтая несправядлівасць

Галіна Галубенка 23 гады праслужыла ў вайсковай частцы, мае дзяцей і ўнукаў. Яна прыйшла паставіць подпіс за Святлану Ціханоўскую, бо пасля праглядаў БТ і Белсата прааналізавала для сябе ўсе за і супраць і зрабіла выснову: трэба мяняць нешта ў краіне, а перш за ўсё ўладу. Горш, мяркуе яна, дакладна не будзе. «Маючы 300 рублёў пенсію, чаго ўжо тут страчваць», - кажа суразмоўца, якая да гэтага ні на адны выбары не хадзіла, бо не ўважала іх за выбары, а галасаваннем. А тут «настолькі дапякла ўся гэтая несправядлівасць», што нельга не пайсці і не паставіць подпіс за іншага кандыдата ў кандыдаты, але толькі не за дзейнага...

Права выбару не меў, але вось з'явілася надзея

Анатоль Жарко не назваў месца працы, але, усміхнуўшыся, сказаў, што людзі і так пазнаюць яго праз прозвішча. Ён не баіцца публічнасці. Галоўнае, што падштурхнула яго прыйсці і падпісацца за «кандыдатку ў кандыдаты» Ціханоўскую - жаданне, каб у чалавека было права выбару, а да гэтага ён гэтага права, з ягоных слоў, не меў, але вось з'явілася надзея.

Характэрна, што кожнаму з ахвотных падпісацца за Святлану Ціханоўскую даводзілася стаяць у чарзе як мінімум паўгадзіны, але яны ў адзін голас заяўлялі: гэта ж лёс краіны, у якой жыць нам і нашым дзецям, таму тут не толькі паўгадзіны, можна і днямі стаяць.

Пасля 1994-га не хадзіў на выбары, а тут трыванне лопнула

Лунінчук Мікалай прозвішча не назваў, хоць ужо пенсіянер:

- Сын у мяне памежнік, як бы яму не адгукнулася. А так назваўся б. Цяпер усё трымаецца ў нашай краіне на страху. Ды колькі можна ўжо! Пасля 1994-га я не хадзіў на выбары. Ведаў, што гэта тэатр. А тут трыванне лопнула. Ехаў з гаража, убачыў пікет і адразу дадому па пашпарт.

Перамены неабходныя

Жыхарка Лунінца Святлана Пятроўна Жук - у мінулым дзяржаўная службоўка. Пенсіянерка. Уважліва сочыць за перадвыбарнай кампаніяй, хоць раней не хадзіла на выбары. Цяпер падумала, што далей трываць хамства з боку ўлады нельга, перамены неабходныя.

Мы за мірную змену ўлады

- Мы - вайскоўцы, - сказалі двое хлопцаў у цывільным адзенні. - Малодшыя афіцэры. Таму не можам назваць свае прозвішчы. Але запэўніваем, што страляць у свой народ, калі будзе такі загад, не будзем. І нашы калегі, спадзяемся, таксама. Вось і прыйшлі падпісацца за таго кандыдата ў кандыдаты, які ніколі такі загад не аддасць, у чым упэўненыя стоадсоткава. Мы за мірную змену ўлады.

Падчас размовы з людзьмі з чаргі відавочна, што яны настроены міралюбна і хочуць сумленных выбараў. Дзейную ўладу ў большасці сваёй не лаюць, проста мяркуюць, што ў цывілізаванай краіне абавязкова павінна быць змяняльнасць улады, а кіраўніцтва краіны абнаўляцца свежымі розумамі і інтэлектуальным патэнцыялам у глабальным разуменні гэтага слова.