Удзельніца Флэшмобу салідарнасці: Мая начальніца ўжо задумалася, ці не выйсці ёй з выбарчай камісіі

У Беларусі ўсё мяняецца на вачах.

Тэлеграм-канал «Баста!» апублікаваў ліст удзельніцы Флэшмобу салідарнасці.

«Чытаю ўвесь час навіны ў чатах і тэлеграм-каналах, захапленне нашым народам усё большае і большае. Нарэшце людзі прачнуліся і вельмі дружна.

Усё больш і больш знаёмых падтрымліваюць Флэшмоб салідарнасці. Я таксама ўключаю «Муры абрынуцца». Чытаю ўслых суседзям тое, што пішуць у тэлеграм-канале. Гэта пачало дзейнічаць, людзі сталі слухаць, цікавіцца дзе гэта можна прачытаць, сталі навінамі дзяліцца пра тое, што з раённай газеты моладзь рэзка звальняць сталі праз яе погляды. Мая начальніца - у выбарчай камісіі, ужо задумалася, можа, ёй не варта там быць?»

Беларускія блогеры і актывісты прапанавалі праводзіць Флэшмоб салідарнасці. Мэта акцыі - падтрымаць медыкаў, якія змагаюцца за нашы жыцці і герояў, якія цяпер знаходзяцца за кратамі.

Штодзень а 19:00 на знак салідарнасці адчыняем вокны кватэр, выходзім на балконы, пляскаем у ладкі, бразгаем рондалямі або ўключаем музыку. Толькі 2 хвіліны - але штодзень і да перамогі!