«Немагчыма нават нармальна памыцца»

Жыхарам вёскі на Гомельшчыне абяцалі развязаць праблему з вадой, але нешта пайшло не так.

25 чэрвеня вёска Перасека Гомельскай вобласці засталася без вады. Улады развязаць праблему не спяшаліся, абгрунтаваўшы тым, што тут жыве мала людзей. Аднак ужо на наступны дзень раённая газета «Свободное слово» паведаміла, што праблема ёсць, а старшыня Дварэцкага сельвыканкама паабяцаў арганізаваць падвоз пітной вады ў вёску, піша сайт «Сильные новости».

Праз амаль два тыдні ў рэдакцыю зноў звярнуліся мясцовыя жыхары. «Сёння 7 ліпеня, а мы ўсё яшчэ без вады», - кажуць яны.

Высветлілася, што пасля першай публікацыі гэтай гісторыі скаргаў стала больш. Аднак, калі старшыня Дварэцкага сельвыканкама прыехаў на месца, каб асабіста высветліць сітуацыю, ён апытаў чамусьці толькі аднаго жыхара.

Са слоў Аліны, развязаць гэтую праблему з дапамогай фільтраў немагчыма. У якасці доваду сваіх слоў яна паказала, у што ператвараецца новы картрыдж даслоўна праз некалькі гадзін. «Перавышэнне жалеза ў 10 разоў. Немагчыма нармальна памыцца. Іржу трэба адмываць амаль кожны дзень. Псуецца не толькі сантэхніка і посуд, але і дарагая тэхніка - бойлер, пральная машына», - распавядае дзяўчына.

Учора ў вёску зноў прыехаў старшыня Дварэцкага сельвыканкама і прывёз два бітоны вады, але мясцовыя жыхары браць яе не сталі. «Мы ж не ведаем, адкуль яна. Нам патрэбна вада ў бутэльках», - кажуць яны. На што атрымалі адказ: «Дык яна ж грошай каштуе!» Мясцовыя жыхары не супраць плаціць за пітную ваду, але яе ў вёсцы, на жаль, няма.

Ім прапанавалі развязанне - прабіць агульную свідравіну, аднак і тут ёсць свае мінусы. «Свідравіна ніяк не ўплывае на водаправод, з крана будзе ісці тая ж іржавая вада. Плюс там таксама будзе перавышэнне нітратаў, як і ў студнях. Калі ж зробяць глыбокую - то тады не пазбегнуць перавышэння жалеза. Відавочна, яны проста хочуць фармальна «развязаць» праблему, але нічога не зменіцца», - упэўненыя мясцовыя жыхары.

Зрэшты, з прапановай жыхароў правесці водаправод старшыня таксама не згодны. «Перш чым правесці, трэба зрабіць праектна-каштарысную дакументацыю. Для гэтага патрэбныя грашовыя сродкі. Шалёныя грошы!» - кажа ён.

Мясцовыя жыхары накіравалі ў Гомельскі аблвыканкам і Адміністрацыю Лукашэнкі звароту, дзе просяць паставіць станцыю абезжалезвання або правесці водаправод. А пакуль улады разбіраюцца з праблемай, людзі па-ранейшаму застаюцца без вады.