15 жнiўня 2020, Субота, 10:26
Сім сім, Хартыя 97!
Рубрыкі

Высокі прадстаўнік ЕЗ: Беларускія ўлады павінны вызваліць усіх затрыманых

13
Высокі прадстаўнік ЕЗ: Беларускія ўлады павінны вызваліць усіх затрыманых
ЖАЗЭП БАРЭЛЬ

Жазэп Барэль заявіў, што Брусэль сочыць за сітуацыяй у Беларусі.

Еўразвяз вельмі занепакоены перашкодамі для працы журналістаў і пераследамі шэрагу апазіцыянераў у Беларусі, асабліва напярэдадні так званых прэзідэнцкіх выбараў.

"Мы заклікаем выконваць правы чалавека. Мы настойваем у кантактах з беларускім бокам, што нядаўняе развіццё падзей павінна быць спыненае", – сказаў высокі прадстаўнік ЕЗ у замежных справах Жазэп Барэль, выступаючы ў чацвер на пленарнай сесіі Еўрапейскага парламента ў Брусэлі, паведамляе "Інтэрфакс".

Ён паведаміў, што ЕЗ кантактаваў з уладамі Беларусі з мэтай вызвалення затрыманых у краіне людзей. "Мы будзем уважліва назіраць за выбарамі", – паабяцаў кіраўнік еўрапейскай дыпламатыі.

Барэль нагадаў, што Беларусь з'яўляецца ўдзельніцай праграмы "Усходняе партнёрства", якая выгадная абодвум бакам. Таму ў інтарэсах усіх еўрапейцаў, каб у Беларусі былі палепшаныя дзейныя там некаторыя нормы.

Стасункі Еўразвязу з Беларуссю, адзначыў кіраўнік дыпламатыі ЕЗ, будуюцца на шэрагу важных прыярытэтаў, якія ўключаюць павагу правоў чалавека. Ён паказаў на неабходнасць большай адкрытасці ЕЗ у дачыненні да Беларусі і прадаўжэнне падтрымкі суверэнітэту і незалежнасці гэтай краіны. Але гэта, паводле ягоных словаў, павінна быць звязана з пазітыўнымі вынікамі ў Беларусі ў галіне правоў чалавека, асноўных каштоўнасцяў і свабодаў.

Паводле словаў Барэля, развіццё стасункаў "можа быць заснаванае толькі на пазітыўных кроках да дэмакратызацыі, вяршэнства закона, правоў чалавека і фундаментальных свабодаў".

"Прэзідэнцкія выбары будуць вельмі важныя пры планаванні далейшых дзеянняў і вызначэнні нашых стасункаў", – сказаў на заканчэнне вярхоўны прадстаўнік Еўразвязу.