Майк Пампэа: ЗША гатовыя адказаць Расеі на атручэнне Навальнага
- 22.09.2020, 9:56
- 12,177
Выкарыстанне хімічнай зброі непрымальнае.
Дзяржсакратар ЗША Майк Пампэа заявіў, што амерыканскія ўлады гатовыя адказаць Расеі на атручэнне расейскага апазіцыянера Аляксея Навальнага.
Пра гэта ён сказаў у інтэрв'ю нямецкаму выданню Bild.
«Злучаныя Штаты ясна далі зразумець, што выкарыстанне хімічнай зброі непрымальнае. Калі хімічная зброя была выкарыстаная супраць (Сяргея і Юліі) Скрыпалёў, мы далі вельмі смелы адказ. Няма прычын меркаваць, што ЗША не адрэагуюць суразмерным чынам на тое, што магло адбыцца, як толькі будуць даступныя ўсе факты», - адзначыў Пампэа.
Нагадаем, 10 верасня Пампэа заяўляў, што існуе вялікая імавернасць таго, што атручванне Навальнага было замоўлена высокапастаўленымі чыноўнікамі ў Маскве.
20 жніўня Аляксея Навальнага шпіталізавалі з борта самалёта, які экстранна сеў у Омску.
22 жніўня апазіцыянера даставілі на лячэнне ў Нямеччыну.
Нямецкія вайсковыя таксіколагі выявілі, што Навальны быў атручаны рэчывам з групы Навічок.
Праз некалькі тыдняў пасля атручвання стала вядома, што стан Навальнага палепшыўся і яго ўжо адключылі ад апарата ШВЛ.
Цяпер Навальны працягвае лячэнне ў нямецкай клініцы Шарытэ.