Кіраўніцтва ААТ «Беларуськалій» спалохалася разрыву кантрактаў з нарвэжскай кампаніяй Yara

Адміністрацыя заяўляе, што са страйкоўцаў-шахцёраў знятыя спагнанні, а звольненыя могуць быць прынятыя назад.

«Беларуськалій» гатовы ўзаемадзейнічаць з нарвэжскай кампаніяй Yara на доўгатэрміновай аснове ў галіне прамысловай бяспекі і прыняць спецыялістаў кампаніі для маніторынгу вытворчых працэсаў. Акрамя таго, звольненыя раней працаўнікі могуць зноў быць прынятыя на працу, калі пададуць заявы. Адпаведны прэс-рэліз быў апублікаваны 20 студзеня на сайце «Беларуськалія».

- Мы знаходзімся ў пастаянным кантакце і працягнем надалей супрацоўніцтва з кампаніяй «Яра» ў пытаннях гарантавання бяспекі ўмоў працы, паляпшэння здароўя і падвышэння сацыяльнага ўзроўню нашых работнікаў, - гаворыцца ў прэс-рэлізе «Беларуськалія». - Кіраўніцтвам прадпрыемства прынятая пастанова аб зняцці дысцыплінарных спагнанняў з работнікаў прадпрыемства (прэс-рэліз ад 17 снежня 2020 года), а звольненыя раней працаўнікі могуць быць прынятыя назад на працу ў ААТ «Беларуськалій» у выпадку падачы імі адпаведных заяў.

Таксама адміністрацыя «Беларуськалія» абмеркавала разам з прафсаюзнымі арганізацыямі прадпрыемства падвышэнне эфектыўнасці работы грамадскага кантролю за бяспекай вытворчасці. Найбліжэйшым часам наймальнік і прафзвязы ўнясуць адпаведныя прапановы для ўдасканалення «Пунктаў для працы грамадскіх інспектараў», піша tut.by.

20 студзеня Святлана Ціханоўская і прэзідэнт Yara Свэйн Торы Холзэтэр правялі онлайн-сустрэчу, падчас якой абмеркавалі сітуацыю на «Беларуськаліі». Пра гэта паведамляе тэлеграм-канал Ціханоўскай.

- Святлана Ціханоўская нагадала, што Yara прапаноўвала перагледзець кантракт з «Беларуськаліем», калі рэпрэсіі на прадпрыемстве працягнуцца. Вельмі важна, каб Yara казала пра тое, якія ўмовы выстаўляе «Беларуськалію». Торы Холэтэр заявіў, што кампанія будзе бараніць этычныя прынцыпы вядзення бізнэсу і далей заступацца за працаўнікоў «Беларуськалія», - гаворыцца ў паведамленні.

Як развівалася сітуацыя з «Беларуськаліем» і Yara

Нарвэжская кампанія Yara - найбуйнейшы сусветны вытворца ўгнаенняў і адзін з асноўных гандлёвых партнёраў «Беларуськалія». Беларуская калійная кампанія традыцыйна працуе з ёй паводле пяцігадовага кантракту. Да прыкладу, паводле дамовы 2011-2015 гадоў БКК пастаўляла кампаніі Yara больш за 1 мільёна тон калійных угнаенняў штогод.

У верасні прадстаўнікі Yara ў першы раз прыехалі ў Менск на перамовы з прадстаўнікамі Беларускай калійнай кампаніі і прафсаюзаў. Напярэдадні гэтага візіту Yara размясціла на сваім сайце паведамленне, у якім выказала занепакоенасць сітуацыяй у Беларусі і лёсам звольненых і адбываюць пакаранне шахцёраў.

У снежні «Беларуськалій» наведалі гендырэктар Yara Свейн Торы Холзетер і яшчэ некалькі прадстаўнікоў менеджменту кампаніі. Размова на закрытай сустрэчы з кіраўніцтвам «Беларуськалія» ішла пра ўмовы, якія трэба выканаць, каб адпавядаць Кодэксу паводзін для дзелавых партнёраў Yara. Напярэдадні візіту Свейн Торы Холзетера на сайце Yara было апублікавана яго зварот з нагоды сітуацыі ў Беларусі.

- Нягледзячы на нашы пастаянныя намаганні па дасягненню пераменаў праз дыялог, мы не ўбачылі значных паляпшэнняў у становішчы працаўнікоў "Беларуськалія". Мы асабліва занепакоеныя шматлікімі паведамленнямі аб звальненні рабочых, якія мірна выказвалі свае дэмакратычныя правы. <...> Мы павінны бачыць істотнае паляпшэнне ўмоў і адносін з персаналам «Беларуськалія», спыненне рэпрэсій, а таксама паляпшэнне ўмоў бяспекі працы, - гаварылася ў звароце.

Падчас снежаньскага візіту на "Беларуськалій" прадстаўнікі Yara таксама ўзнялі пытанні аховы працы, тэхнікі бяспекі і няшчасных выпадкаў са смяротным канцом на прадпрыемстве. У 2020 годзе на «Беларуськаліі» было некалькі падобных выпадкаў. У сакавіку машына, у якой працоўныя ехалі на аб'ект, ўрэзалася ў сцяну. Кіроўца загінуў, шэсць чалавек у цяжкім стане даставілі ў бальніцу. Як распавёў TUT.BY крыніца на «Беларуськаліі», прычынай аварыі магла стаць няспраўнасць машыны, скаргі на гэтую тэхніку паступалі даўно. У чэрвені быў смяротна траўмаваны 21-гадовы рабочы. У канцы кастрычніка працаўнік «Беларуськалія» пацярпеў і трапіў у бальніцу з траўмамі, у пачатку лістапада загінуў яшчэ адзін работнік.

Беларусы таксама актыўна пакідаюць каментары ў сацсетках кампаніі Yara і просяць яе не заключаць новы кантракт з «Беларуськаліем».