У Крамлі ацанілі перспектыву сустрэчы Пуціна і Зяленскага
9- 17.10.2021, 15:25
- 10,814
З заявай выступіў Пяскоў.
Прэс-сакратар прэзідэнта РФ Дзмітрый Пяскоў назваў дрэннымі перспектывы сустрэчы лідараў Расеі і Украіны Уладзіміра Пуціна і Уладзіміра Зяленскага. У гэтым ён абвінаваціў Украіну.
Пра гэта ён заявіў у інтэрв'ю расейскаму тэлеканалу, паведамляе РБК-Украина.
Пяскоў растлумачыў, што ўлады Украіны нібыта не выконваюць менскія дамоўленасці.
«Менавіта яны зараз праводзяць законапраект аб так званым пераходным перыядзе, які дэ-факта будзе азначаць выхад Кіева з менскіх дамоўленасцей», - сказаў ён.
Пяскоў таксама ацаніў перспектывы сустрэчы Пуціна і Зяленскага.
«Пакуль асаблівых перспектыў для гэтай размовы не праглядаецца, зноў жа, праз дзеянні ўкраінскіх уладаў», - сказаў Пяскоў.
З ягоных слоў, Зяленскі называе Расею бокам канфлікту на Данбасе.
«Удзельнікі канфлікту апісаныя ў менскім комплексе захадаў. І менскі комплекс захадаў ён жа з'яўляецца дакументам Арганізацыі Аб'яднаных Нацый. І, адпаведна, калі прэзідэнт Украіны не прызнае дакумент Арганізацыі Аб'яднаных Нацый і дэ-факта ставіць пад пытанне подпіс прэзідэнта Украіны пад гэтым дакументам, ну, як тут можна мець зносіны», - сказаў ён.
Нагадаем, раней Пяскоў казаў, што на сёння ў Крамлі не бачаць перспектывы сустрэчы з прэзідэнтам Украіны Уладзімірам Зяленскім. Бо, з пункту гледжання Масквы, «мадальнасць не мяняецца».
Акрамя таго, у Пуціна выключаюць, што на такой сустрэчы будзе паднятая тэма акупаванага Крыма.