Новая назва Facebook: што такое метасусвет і як ён працуе

Кампанія мяняе сваю назву на Meta.

Марк Цукерберг заявіў аб тым, што кампанія Facebook мяняе сваю назву на Meta Platforms Inc або скарочана Meta. Гэта самая маштабная падзея, якая адбылася з паняццем «метасусвет» з таго моманту, як яго ўпершыню выкарыстаў Ніл Стывенсан у рамане «Лавіна», піша zn.ua.

Але, як адзначае агенцтва, Цукерберг і ягоная каманда - не адзіныя, у каго ёсць уласнае бачанне таго, як можа функцыянаваць метасусвет, які будзе спалучаць выкарыстанне віртуальнай рэальнасці і іншых тэхналогій. І тыя, хто задумваўся пра гэты новы свет, звязаныя з гігантам сацсетак, занепакоеныя тым, што ён атрымае доступ да яшчэ большай колькасці звестак карыстальнікаў. Кампанію ўжо абвінавачваюць у тым, што яна няздольная спыніць распаўсюджванне дэзінфармацыі ў Інтэрнеце, якая толькі ўзмацняе ўжо існыя праблемы.

Што такое метасусвет

Цукерберг апісвае яго як «віртуальнае асяроддзе», у якое карыстач можа пагрузіцца, а не проста назіраць праз экран. Фактычна, гэта свет узаемазвязаных, бясконцых віртуальных супольнасцяў, у якіх людзі могуць сустракацца, працаваць і гуляць, выкарыстоўваючы акуляры дапоўненай рэальнасці, прыкладанні для смартфонаў і іншыя прылады.

Са слоў аналітыка Вікторыі Пятрок, якая сочыць за развіццём тэхналогій, метасусвет будзе ўключаць і іншыя аспекты онлайн-жыцця, такія як пакупкі і сацсеткі.

«Гэта наступны этап узаемадзеяння, у якім рэчы аб'ядноўваюцца ў адзіны дваісты сусвет. Вы можаце жыць віртуальным жыццём гэтак жа, як вы жывяце фізічным», - заявіла яна.

Што можна рабіць у метасусвеце

Напрыклад, схадзіць на онлайн-канцэрт або здзейсніць віртуальнае падарожжа. А яшчэ стварыць аб'ект віртуальнага мастацтва або набыць віртуальнае адзенне.

Метасусвет таксама можа змяніць свет выдаленай працы, у якім мы жывем у часы пандэміі. Замест таго, каб глядзець на калегаў падчас відэазванка, можна будзе далучыцца да іх у віртуальным офісе.

Facebook ужо выпусціў праграмнае забеспячэнне Horizon Workrooms, якое можна выкарыстоўваць з акулярамі віртуальнай рэальнасці Oculus. Разам з тым, раннія адзнакі прадукту былі не вельмі высокімі. Гарнітура каштуе 300 даляраў і больш, што робіць перадавыя магчымасці метасусвету недаступнымі для многіх. Тыя ж, хто можа сабе гэта дазволіць, могуць у выглядзе аватараў перамяшчацца паміж рознымі віртуальнымі сусветамі, створанымі кампаніямі.

«Вялікая частка ўражанняў ад метасусвету будзе звязаная з магчымасцю тэлепартавацца ад аднаго досведу да іншага», – кажа Цукерберг.

Разам з тым, тэхналагічным кампаніям давядзецца дамовіцца, каб аб'яднаць свае онлайн-платформы адна з адной. Каб метасусвет мог працаваць, тэхналагічныя кампаніі павінны прыйсці да адзіных стандартаў. Інакш могуць з'явіцца групы людзей, якія існуюць у розных метасусветах.

Ці пяройдзе Facebook цалкам у метасусвет

Цукерберг разглядае праект як будучыню інтэрнэту, бо мяркуе, што ён стане вялікай часткай лічбавай эканомікі. Крытыкі таксама мяркуюць, што такія кардынальныя змены з'яўляюцца спробай выйсці з крызісу, які пачаўся пасля публікацыі матэрыялаў, заснаваных на ўнутраных дакументах Facebook.

Разуменне метасусвету Цукерберга крыху адрозніваецца ад таго, як яе бачаць іншыя. Энтузіясты стварэння метасусвету разглядаюць яго як вызваленне онлайн-культуры ад карпарацый, такіх як Facebook. Такія кампаніі атрымліваюць асабовыя звесткі карыстальнікаў, іх фатаграфіі, допісы і плэйлісты, а потым гандлююць звесткамі, якія атрымалі, прааналізаваўшы інфармацыю.

Разам з тым, Facebook плануе перанесці сваю палітыку, заснаваную на выкарыстанні звестак карыстальнікаў, і ў метасусвет. Са слоў Цукерберга, рэклама прадоўжыць заставацца важнай часткай сацсетак і, магчыма, метасусвету.

Са слоў Пятрок, яна баіцца таго, што новы праект дазволіць кампаніі збіраць яшчэ больш персанальных звестак карыстальнікаў. Яна таксама можа стаць пляцоўкай, дзе будзе распаўсюджвацца яшчэ больш дэзінфармацыі, калі Facebook не зможа справіцца з гэтай праблемай на сваіх платформах.