Работнікі завода «Камунарка»: Прадпрыемства ў прастоях, працы мала

Беларускія заводы ў шакавальным стане.

Чарговая хваля рэпрэсій пачалася на беларускіх заводах. Пра гэта «Еўрарадыё» паведамілі працаўнікі прадпрыемстваў, якія патрапілі ў чорны спіс. У Свабодным прафзвязе металістаў пацвердзілі - людзей звальняюць, да іх паступаюць звароты. Прычына ўсё тая ж - пакінулі подпіс не за таго, выходзілі на акцыі пратэстаў пасля выбараў-2020.

Са слоў сябраў незалежнага прафзвязу, спісы на вылет ёсць на «Камунарцы», на Трактарным і Маторным заводах, МАЗе, у «Кабельных сетках», на «Магілёўліфтмашы» ды іншых.

- Хутчэй за ўсё, спіс прадпрыемстваў, дзе цяпер звальняюць, большы. Проста не ўсюды ў нас засталіся актывісты, - адзначаюць у незалежным прафзвязе.

У «Мінскіх кабельных сетках» ужо не першы раз супрацоўнікаў звальняюць згодна са спушчанымі зверху спісамі. Папярэдняя зачыстка была ў канцы лютага. Тады людзі расказвалі, што ім прапануюць напісаць заяву на ўласнае жаданне, у адваротным выпадку яны будуць звольненыя паводле артыкула Працоўнага кодэкса. Цікава, што да гэтага нараканняў на іх працу не было. Самі працаўнікі звязвалі гэта з іх удзелам у акцыях салідарнасці і пратэстах пасля выбараў у жніўні 2020 года.

- Цяпер, па чутках, збіраюцца ў нас звольніць 7 чалавек. Адзін з іх намеснік начальніка цэха. Прычына - нібыта паездка на МЗКЦ у жніўні 2020-га. Спісы на звальненне былі складзеныя пасля таго. Але пра афіцыйную прычыну я вам не скажу, не ведаю. Просяць пісаць заявы на звальненне на дамову бакоў, - распавёў супрацоўнік прадпрыемства.

Зачышчаюць і ў рэгіёнах. Як гавораць работнікі «Магілёўліфтмаша», у іх працоўныя збіраюцца вярнуць прыкладна сотні работнікаў.

- Усяго ў нас недзе 4,5 тысячы работнікаў на прадпрыемстве. Не ведаю, ці можна сто назваць масавым звальненнем. Але гэта дастатковая колькасць, каб праца прадпрыемства пагоршылася, - мяркуе адзін з супрацоўнікаў. - Мне не вядомыя дакладныя прычыны звальненняў. Але ведаю дакладна, што праз палітыку. Людзі выбралі не таго кандыдата.

Крыху раней паведамлялася, што звальненні ідуць на ААТ «Зеніт», якое вырабляе святлодыёдныя лямпачкі. Пакуль што пацверджанае звальненне пяці работнікаў гэтага прадпрыемства, але іх можа быць больш - амаль два дзясяткі.

Чысткі прайшлі і на «Магілёўхімвалакне». Пачынаючы з кастрычніка там аддалі працоўныя больш чым 70 супрацоўнікам.

У Свабодным прафзвязе металістаў распавялі: «Звярталіся да нас работнікі «Камунаркі» па дапамогу. Гавораць, што ў іх з'явіўся спіс на звальненне, у якім амаль 300 чалавек. Гэта амаль чвэрць калектыва».

Супрацоўнікі фабрыкі пацвердзілі - людзей звальняюць.

- Хоць афіцыйна гэта не звальненні. Людзям кажуць: «Ну вы ж усё разумееце», не прадаўжаюць кантракты або просяць сысці на дамову бакоў, - дзеліцца працаўніца прадпрыемства.

- Людзі баяцца. Старшыню суполкі незалежнага прафзвязу на МАЗе Арцёма Жарнака арыштавалі акурат тады, калі ён меў стасункі з працаўнікамі «Камунаркі», спрабаваў ім дапамагчы. Яго адвезлі на Акрэсціна і далі 10 дзён. У ягонай кватэры быў ператрус.

Таксама ў прафзвязе адзначылі, што праз эканамічную сітуацыю ў краіне і адсутнасці заказаў на некаторых прадпрыемствах работнікам стала больш складана абараняць свае правы.

- Цяпер шмат дзе дэфіцыт кадраў. Іншае пытанне, што многія прадпрыемствы без працы. Са слоў работнікаў завода «Камунарка», прадпрыемства ў прастоях, працы мала.

На Трактарным заводзе, напрыклад, пакуль яшчэ планы ёсць, праца ёсць. Але нават гэта нікога асабліва не хвалюе. І там звальненні. Кіраўнікі на тым жа МТЗ пастаўленыя зверху. Ім важна застацца лаяльнымі да ўлады і захаваць свае месцы.

- А пра тое, што пры гэтым яны знішчаюць прадпрыемства і працы наогул не будзе, такія людзі не думаюць, - кажа прадстаўнік прафзвязу. - У асноўным звальненнямі займаюцца аддзелы ідэалогіі і людзі, якія чамусьці пайшлі на супрацоўніцтва.