Ізраільскія медыкі назвалі найлепшы час для бустэрнай прышчэпкі ад каранавіруса

Гэта дазволіць максімальна павысіць імунную ахову арганізма.

«Даследаванне, праведзенае ў Ізраілі, паказала, як зніжаецца імунітэт да Sars-CoV-2, набыты дзякуючы мРНК-вакцынам. Паводле звестак даследавання, агулам імунная ахова застаецца стабільнай цягам першых трох месяцаў. Затым, нягледзячы на вакцынацыю, рызыка заражэння паступова ўзрастае», - піша нямецкі часопіс Focus (пераклад - inopressa.ru).

«Паколькі з цягам часу ў крыві цыркулюе ўсё менш спецыфічных для Sars-CoV-2 антыцелаў і Т-клетак, імуннай сістэме патрабуецца больш часу для рэакцыі. Асабліва для «дэльта»-варыянту віруса, які хутка размнажаюцца, гэтага часу дастаткова, каб атабарыцца ў нашым арганізме», - тлумачыць выданне.

«Але наколькі хутка і сур'ёзна зніжаецца імунная ахова? Гэта паказала даследаванне з Ізраіля, у якім навукоўцы пад кіраўніцтвам Арыэля Ізраіля з кампаніі медыцынскага страхавання Leumit прааналізавалі звесткі больш чым 80 тысяч вакцынаваных людзей. Яны параўналі, у колькіх з удзельнікаў ПЛР-тэст быў станоўчым, нягледзячы на вакцынацыю, і як іх колькасць мянялася з павелічэннем прамежку часу пасля ўвядзення другой дозы вакцыны».

«Ізраіль быў у ліку першых краін, якія правялі маштабную кампанію вакцынацыі», – тлумачаць даследчыкі. Дзякуючы выкарыстанню мРНК-вакцыны ад BioNTech/Pfizer ужо на ранніх этапах была дасягнутая вельмі шырокая імунізацыя насельніцтва. У той жа час, аднак, Ізраіль стаў адной з першых краін, дзе колькасць выпадкаў захворвання на каранавірусы зноў стала расці, нягледзячы на вакцынацыю - ужо ў чэрвені 2021 года захворванне там пачало павялічвацца. Таму каманда навукоўцаў вывучыла, як гэта звязанае са зніжэннем імуннай аховы».

«Вынік: у першыя тры месяцы пасля другой прышчэпкі доля заражэнняў каранавірусам склала блізу 1,3 адсотка. Паколькі некаторыя ўдзельнікі праходзілі планавае тэставанне, гэтыя станоўчыя выпадкі таксама ўключалі многія выпадкі бессімптомнага цячэння захворвання», - гаворыцца ў артыкуле.

«Аднак на чацвёртым месяцы ўзровень заражэння пачаў адчувальна расці: колькасць станоўчых тэстаў ужо дасягнула 2,4 адсотка - гэта значыць, павялічылася амаль удвая. У пяты месяц доля заражэнняў вырасла да 4,6 адсотка. Затым, пачынаючы з пятага месяца, ахова стала зніжацца яшчэ больш прыкметна: у перыяд ад 150 да 179 дзён пасля другой прышчэпкі ўзровень заражэнняў склаў 10,3 адсотка; праз больш як 180 дзён ён вырас да 15,5 адсотка».

«Гэтыя вынікі пацвярджаюць, што імунітэт да Sars-CoV-2, атрыманы дзякуючы вакцынацыі мРНК-вакцынай, пачынае паступова зніжацца прыкладна з трэцяга месяца. Праз шэсць месяцаў рызыка заражэння, нягледзячы на вакцынацыю, складае ўжо цэлых 15%. Аднак у даследаванні вывучалася толькі частата заражэння, але не тое, наколькі цяжкімі былі сімптомы Covid-19 пры гэтых паўторных заражэннях і ці выяўляліся яны ўвогуле ва ўдзельнікаў», - адзначае выданне.

«Аднак, на думку даследчыкаў, гэтыя вынікі падкрэсліваюць, што мэтазгодна праводзіць рэвакцынацыю пачынаючы прыкладна з пятага месяца - хаця б для таго, каб спыніць далейшае распаўсюджванне каранавіруса. Таму што нават калі людзі, якія заразіліся нягледзячы на вакцынацыю, не хварэюць самі, яны могуць перадаць вірус іншым. (British Medical Journal (BMJ), 2021; doi: 10.1136/bmj-2021-067873)», - паведамляе Focus.