ЗША, Канада, ЕЗ і Вялікабрытанія ўвялі санкцыі супраць рэжыму Лукашэнкі

Пад санкцыі патрапілі дзяржаўны абавязак, прадпрыемствы і лукашысты.

ЗША, Канада, Еўразвяз і Вялікабрытанія ўвялі санкцыі супраць рэжыму Лукашэнкі.

Еўразвяз прыняў пяты пакет санкцый супраць Менска ў сувязі з міграцыйным крызісам на мяжы Беларусі і краін ЕЗ.

«Абмежаванні прынятыя «ў сувязі з гібрыднымі дзеяннямі Беларусі па выкарыстанні мігрантаў для аказання ціску на дзяржавы Еўразвяза», - гаворыцца ў заяве Рады ЕЗ.

Пяты пакет санкцый ЕЗ ахоплівае 17 фізічных і 11 юрыдычных асоб, якія прымалі непасрэдны ўдзел у абвастрэнні сітуацыі з мігрантамі на заходняй мяжы Беларусі, а таксама суб'екты хімічнага і авіяцыйнага сектараў, і які займаецца аўтазапчасткамі. Пасля ўвядзення абмежаванняў кампаніі, якія трапілі ў спіс, не змогуць весці справы з еўрапейскімі партнёрамі. Санкцыі набудуць моц пасля апублікавання ў «Афіцыйным часопісе ЕЗ».

Пад санкцыі патрапілі:

Анатоль Лапо, старшыня Дзяржаўнага памежнага камітэта;

Ігар Кручкоў, начальнік асобнай службы актыўных мерапрыемстваў Дзяржаўнага памежнага камітэта;

Канстанцін Моластаў, начальнік Гарадзенскай памежнай групы;

Павел Харчанка, начальнік Гарадзенскай памежнай групы;

Ігар Гутнік, начальнік Берасцейскай групы аховы;

Аляксандр Давідзюк, начальнік Лідскага памежнага атрада;

Максім Бутранец, начальнік Смаргонскага памежнага атрада;

Анатоль Глаз, прэс-сакратар МЗС;

Сяргей Епіхаў, суддзя Менскага раённага суда;

Ігар Любавіцкі, суддзя Вярхоўнага Суда;

Сяргей Гіргель, старшы пракурор Генпракуратуры;

Валянціна Кулік, суддзя Вярхоўнага Суда;

Ігар Маршалаў, дырэктар ДФР КДК;

Андрэй Пракапук, намеснік дырэктара ДФР КДК;

Ганна Сакалоўская, суддзя калегіі Вярхоўнага Суда ў цывільных справах;

Марат Маркаў, старшыня праўлення ЗАТ «Другі нацыянальны тэлеканал» (тэлеканал АНТ);

Зміцер Карсюк, суддзя Цэнтральнага раённага суда Менска.

«Белавія»,

«Цэнтркурорт»,

«Аскартур»,

гатэль «Менск»,

гатэль «Планета»,

Асобная служба актыўных мерапрыемстваў Дзяржаўнага памежнага камітэта,

Cham Wings Airlines (Сірыя),

візавы цэнтр VIP Grub (Турцыя),

«Гродна Азот»,

«Беларуснафта»,

«Гродна Хімвалакно»,

«Белшына».

Злучаныя Штаты таксама ўвялі новыя санкцыі супраць рэжыму Лукашэнкі, паведамляецца на сайце Мінфіна ЗША. Абмежаванні закранулі 20 чалавек, 12 арганізацый і тры самалёты.

Пад санкцыі патрапілі:

сярэдні сын дыктатара Дзмітрый Лукашэнка. Ён займае пасаду старшыні цэнтральнай рады «Прэзідэнцкага» спартовага клуба» і з'яўляецца чальцом Нацыянальнага алімпійскага камітэта Беларусі;

начальнік Галоўнага ўпраўлення ў барацьбе з арганізаванай злачыннасцю і карупцыяй (ГУБАЗіК) МУС Беларусі Андрэй Паршын;

муж экс-прэс-сакратаркі МУС Беларусі Вольгі Чамаданавай Дзяніс Чамаданаў;

намеснік міністра ўнутраных спраў Дзмітрый Карзюк;

кіраўнік Дзяржаўнага памежнага камітэта Беларусі Анатоль Лапо;

ягоны першы намеснік Ігар Буткевіч і намеснікі Сяргей Новікаў і Ігар Печань;

экс-старшыня Федэрацыі хакея Беларусі, сябра Савета Рэспублікі Нацыянальнага сходу, які падазраецца ў забойстве Рамана Бандарэнкі Дзмітрый Баскаў і іншыя.

Акрамя таго, ЗША ўвялі санкцыі супраць дзяржаўнай пазыкі Беларусі, забараніўшы амерыканскім грамадзянам аперацыі з «новымі пазыковымі абавязаннямі» з тэрмінам пагашэння больш за 90 дзён і выпушчанымі 2 снежня ці пазней.

Улады Вялікабрытаніі і Канады абвесцілі аб тым, што далучаюцца да ўведзеных Еўрапейскім звязам і ЗША рэстрыкцыяў у дачыненні да рэжыму Лукашэнкі.

Гэтыя абмежавальныя захады сталі адказам на міграцыйны крызіс, у якім заходнія краіны абвінавачваюць асабіста Аляксандра Лукашэнку і яго паплечнікаў.

Як паказана на сайце брытанскага ўрада, Вялікабрытанія, ЗША, ЕЗ і Канада далі калектыўны адказ на парушэнні ўладамі Беларусі правоў чалавека, якія працягваюцца.

«Сёння ў адказ на атакі на правы чалавека і фундаментальныя свабоды ў Беларусі, якія працягваюцца, у адказ на непавагу да міжнародных нормаў і шматразовыя рэпрэсіўныя акты, мы зноў увялі скаардынаваныя санкцыі супраць пэўных асоб і арганізацый», – адзначаецца ў дакуменце.

Прадстаўнікі брытанскага ўрада паведамілі, што краіна ўводзіць санкцыі ў дачыненні да кампаніі «Беларуськалій», а таксама шэрагу грамадзян рэспублікі.

Між іншым, у спісе аказаліся пяць прапагандысцкіх дзяржаўных СМІ.

Абмежавальныя захады, якія прадугледжваюць забарону на ўезд у Вялікабрытанію і замарозку банкаўскіх рахункаў, уведзены ў дачыненні да старшыні Беларускага саюза журналістаў, прапагандыста Андрэя Крывашэева, намесніка старшыні Белтэлерадыёкампаніі Сяргея Гусачэнкі, прапагандыста «Саўбелкі» Андрэя Мукавозчыка і прапагандысткі гэтага ж СМІ Людмілы Гладкай, адносна вар'ята прапагандыста тэлеканала СТВ Рыгора Азаронка.

Таксама ў спісе аказаліся начальнік Галоўнага ўпраўлення ў барацьбе з арганізаванай злачыннасцю і карупцыяй МУС Андрэй Паршы, суддзя суда Фрунзенскага раёна ў Менску Наталля Бугук і былая памочніца пракурора ў гэтым жа судзе Аліна Касьянчык.

Сумесная заява

ЗША, Канада, Вялікабрытанія і ЕЗ апублікавалі сумесную заяву з нагоды прыняцця калектыўных санкцыяў.

Яны патрабуюць ад Менска спынення арганізацыі незаконнай міграцыі праз межы Еўразвяза, вызвалення палітвязняў і пачатку дыялогу з апазіцыяй.

«Мы зноў патрабуем, каб рэжым Лукашэнкі неадкладна і поўнасцю спыніў арганізацыю незаконнай міграцыі праз межы з ЕЗ. Тыя, хто ў Беларусі ці іншых трэціх краінах спрыяюць незаконнаму перасячэнню знешніх межаў ЕЗ, павінны ведаць, што гэта будзе каштаваць ім дорага», - гаворыцца ў тэксце заявы, якую апублікаваў на сваім сайце канадскі МЗС.

У дакуменце таксама змяшчаецца заклік «безумоўна і без прамаруджвання вызваліць амаль 900 палітычных зняволеных, спыніць рэпрэсіўную кампанію і выканаць рэкамендацыі экспертнай місіі Маскоўскага механізма АБСЕ, прыняўшы значныя захады ў ліквідацыі недахопаў, выяўленых у рамках Венскага механізма АБСЕ».

«Рэжым павінен неадкладна ўступіць ва ўсёабдымны і рэальны палітычны дыялог з прадстаўнікамі дэмакратычнай апазіцыі і грамадзянскай супольнасці пры садзейнічанні АБСЕ, які вядзе да новых свабодных і справядлівых прэзідэнцкіх выбараў пад міжнародным назіраннем», - заявілі ЗША і іх хаўруснікі.