Лукашэнкаўскія «дэпутаты» прагаласавалі за павышэнне падаткаў

Новаўвядзенні для ІП, падатак на першую кватэру і падаражанне пасылак з-за мяжы.

У «парламенце» прынялі ў другім чытанні праект закону аб падатковых зменах. Сярод навінак, якія хочуць прыняць, - пачаць спаганяць падатак за першую кватэру, падняць збор для ўладальнікаў аграсядзіб і рамеснікаў, а таксама скараціць для ІП спіс тыпаў дзейнасці, якія абкладаюцца адзіным падаткам. Налета таксама павінны вырасці кошты на алкаголь, цыгарэты, вадкасць для электронных цыгарэт, гэта можа адбыцца праз планы ўлад у пераглядзе ставак акцызаў на іх. Zerkalo.io расказвае пра некаторыя падатковыя змены, якія хочуць увесці чыноўнікі.

На пасяджэнні ў парламенце сёння ў другім чытанні прынялі законапраект «Аб змяненні законаў у пытаннях падаткаабкладання». Цяпер гэты законапраект павінны разгледзець у «савеце рэспублікі», а потым – аддаць на подпіс самазванцу Аляксандру Лукашэнку.

Падатак на першую кватэру

З 2022 года чыноўнікі хочуць спаганяць падатак за першую кватэру (цяпер яго плацяць за другую і наступныя). Гэты збор маюць намер устанавіць на ўзроўні 0,1% ад разліковага кошту аднаго квадратнага метра жылля. Чыноўнікі ўжо прапісалі, як падатак можа адрознівацца па рэгіёнах. У Мінфіне раней прагназавалі, што сярэдняя сума падатку ў Менску будзе на ўзроўні 50 рублёў у год, у рэгіёнах - блізу 25 рублёў. Гэта разлікі для стандартнай кватэры. Чыноўнікі кажуць, што не ўводзяць падатак, а «скасоўваюць ільготы ў падатку на нерухомасць».

Каментуючы ўвядзенне падатку на першую кватэру кіраўнік Мінфіна Юрый Селіверстаў растлумачыў, што рашэнне прымалася для таго, каб «зацікавіць людзей не з'язджаць з сельскай мясцовасці і жыць у сваім жыллі».

Пасылкі з-за мяжы могуць падаражэць

З 1 ліпеня 2022 года хочуць увесці ПДВ пры электронным продажы тавараў. Такую змену чыноўнікі прыдумалі для замежных кампаній і ІП. Плануецца, што гэта дазволіць папоўніць дзяржбюджэт прыкладна на 40 млн. рублёў у год. Калі гэтую змену ўвядуць, то яна можа закрануць, відаць, такія буйныя замежныя інтэрнэт-пляцоўкі, як AliExpress, OZON. Для беларусаў гэта пагражае падаражаннем тавараў, якія яны замаўляюць у замежных інтэрнэт-крамах.

Павінны вырасці кошты на алкаголь, цыгарэты, вадкасць для электронных цыгарэт

З 2022 года маюць намер увесці акцызы на вадкасці для электронных сістэм курэння і на нетытунёвыя нікатыназмяшчальныя вырабы. Гаворка ў тым ліку пра электронныя цыгарэты, парагенератары, вейпы, а таксама павучы (нетытунёвыя нікатынутрымліваючыя вырабы). Цяпер гэта безакцызныя тавары.

Таксама праўкі ў Падатковы кодэкс прадугледжваюць павышэнне ставак акцызаў на піва і цыгарэты. Асобныя стаўкі падаткаў маюць намер падняць апераджальнымі тэмпамі. Так, акцызы на цыгарэты плануюць павысіць у сярэднім на 15 працэнтаў. Для параўнання: зямельны падатак маюць намер праіндэксаваць на 7,2% - прагнозны паказчык у інфляцыі на 2022 год. Гаворка пра сярэднегадавы паказчык па росце коштаў.

Жадаюць увесці новы падатак

У 2023 годзе для самазанятых плануюць увесці падатак на прафесійны прыбытак. Для тых, хто працуе з фізічнымі асобамі, ён складзе 10% (гэта альтэрнатыва выплаце падаходнага падатку і страхавых узносаў у ФСАН). Такая ж стаўка будзе для працоўных з юрыдычнымі асобамі, але да пэўнага памеру даходу, а пасля пазначанага парога падатковы збор будзе ўдвая вышэйшы - 20%.

Плаціць гэты падатак, як прапануюць чыноўнікі, трэба будзе праз спецыяльны мабільны дадатак.

Цяпер памер адзінага падатку для фізічных асоб, якія працуюць без ІП, залежыць ад горада і віду дзейнасці. Напрыклад, у Менску на цырульні і касметычныя паслугі, паслугі манікюру і педыкюру ўстаноўлены падатак сумаю 110 рублёў у месяц, на чыстку і ўборку жылых памяшканняў - 70 рублёў. Раней паведамлялася, што ўлады плануюць павысіць гэтыя значэнні, але захаваць адзіны падатак.

Змяненні для ІП

З наступнага года для прадпрымальнікаў, якія аказваюць паслугі, жадаюць забараніць ужыванне спрошчанай сістэмы падаткаабкладання. Выключэнне могуць зрабіць для некаторых сфер, сярод якіх турызм, ахова здароўя, грамадскае харчаванне, наземны транспарт, дзейнасць у галіне камп'ютарнага праграмавання. Раней такую магчыма хацелі пакінуць таксама для тых ІП, якія займаюцца тэхабслугоўваннем і рамонтам аўтамабіляў.

«З 2023 года – поўнае скасавання прымянення гэтай сістэмы для гэтай катэгорыі плацельшчыкаў», – удакладняюць у «парламенце».

Нагадаем, з 1 студзеня 2023 года перадумалі скасоўваць адзіны падатак для індывідуальных прадпрымальнікаў і іншых фізічных асоб. Замест гэтага чыноўнікі вырашылі падняць гэтыя зборы яшчэ больш, чым планавалі. У «парламенце» ўдакладняюць, што прадугледжаная «карэкціроўка ставак адзінага падатку для індывідуальных прадпрымальнікаў і самазанятых грамадзян у 2,3 — 4 разы».

Новаўвядзенні для рамеснікаў і ўладальнікаў аграсядзіб

Падатак для ўладальнікаў аграсядзіб плануюць узняць да 31 рубля у месяц (цяпер - 58 рублёў у год). Пры гэтым з 2023 года і зусім плануюць скасаваць збор у сферы аграэкатурызму. Раней планавалася гэта зрабіць на год пазней. Пасля скасавання гэтай ільготы падатак жадаюць спаганяць у залежнасці ад выручкі.

Падатак для рамеснікаў маюць намер падняць да 62 рублёў у год (цяпер - 29 рублёў). Пры гэтым гэты збор жадаюць адмяніць з 2023 года.

«Гэтыя меры накіраваны на выраўноўванне падатковай нагрузкі гэтых катэгорый плацельшчыкаў у параўнанні з наёмнымі работнікамі і павышэнне ступені іх удзелу ў фінансаванні дзяржаўных расходаў», - тлумачаць у парламенце.

«Дэпутатам» хочуць дазволіць падвышаць падаткі на прыбытак

Абласным і Менскаму гарадскому «савету дэпутатаў» маюць намер дазволіць павялічваць стандартную стаўку падатку на прыбытак (18%) у межах двух працэнтных пунктаў. «Прадугледжаны мэтавы характар выкарыстання гэтых сродкаў: на фінансаванне расходаў будаўніцтва аб'ектаў інжынернай і транспартнай інфраструктуры для раёнаў жылой забудовы, рэканструкцыі, капітальны і бягучы рамонт мясцовых аўтамабільных дарог», - удакладняюць у «парламенце».