Вярхоўны суд Брытаніі адмовіў Мадуру ў доступе да золата Венесуэлы

Адзіны, хто можа распараджацца залатым запасам Венесуэлы - гэта лідар апазіцыі Хуан Гуайда.

Вярхоўны суд Брытаніі адмовіў венесуэльскаму лідару Нікаласу Мадура ў доступе да залатога запасу краіны коштам амаль два мільярды даляраў, які ляжыць у сховішчы Банка Англіі, піша ВВС.

Гэта ўжо трэцяе рашэнне брытанскіх судовых інстанцый аб золаце Венесуэлы: Вярхоўны суд Брытаніі скасаваў рашэнне Апеляцыйнага суда, які ў ліпені сёлета скасаваў рашэнне Высокага суда Англіі і Уэльса.

У выніку на гэты момант, з пункту гледжання брытанскай судовай сістэмы, адзіны, хто можа распараджацца залатым запасам Венесуэлы, - гэта лідар апазіцыі Хуан Гуайда, якога Брытанія прызнае законным кіраўніком краіны.

У той жа час дэ-факта Брытанія кантактуе з урадам Мадура, бо менавіта ён кантралюе краіну.

У першай палове мінулага года ўрад Мадура паспрабаваў забраць золата з Банка Англіі, тлумачачы, што яму патрэбны грошы на барацьбу з эпідэміяй каранавіруса ў Венесуэле. Атрымаўшы адмову, урад Мадура падаў у суд.

Гуайда і іншыя апаненты Мадура ўпэўненыя, што ён выдаткуе гэтае золата не на барацьбу з ковідам, а на выплаты замежным хаўруснікам яго рэжыму.

Хуан Гуайда, якога прызнаюць прэзідэнтам Венесуэлы больш за 50 краін свету, хоча, каб золата заставалася ў сховішчы Банка Англіі.

Нікалас Мадура, паплечнік і пераемнік нябожчыка прэзідэнта Венесуэлы Уга Чавеса, у 2018 годзе другі раз стаў прэзідэнтам на выбарах, якія апазіцыя такімі не прызнала і абвесціла ім байкот. У пачатку 2019 года Гуайда абвясціў сябе законным кіраўніком венесуэльскай дзяржавы.

І Мадура, і Гуайда прызначылі кожны сваё кіраўніцтва Цэнтральнага банка Венесуэлы.

Венесуэла з 2014 года знаходзіцца пад санкцыямі Еўразвязу, ЗША, Брытаніі і іншых краін за парушэнні правоў чалавека і прыгнечанне дэмакратычных свабод.

Вярхоўны суд Брытаніі, адмовіўшы ў панядзелак Мадура, тым не менш, не стаў ставіць у гэтай спрэчцы апошнюю кропку. Ён прадпісаў Камерцыйнаму суду, падраздзяленню Высокага суда Англіі і Валіі, разгледзець пытанне, ці прызнае Брытанія Хуана Гуайда кіраўніком і дзяржавы, і ўрада Венесуэлы або толькі кіраўніком дзяржавы.

Гуайда вітаў рашэнне Вярхоўнага суда і заявіў, што ён «застанецца верным канстытуцыйнаму абавязку захоўваць гэтыя сродкі рэспублікі для будучых пакаленняў».

Лонданскі адвакат Сарош Зайвала, які прадстаўляе венесуэльскі цэнтрабанк (паводле версіі Мадура), сказаў прэсе, што яго кліенты маюць намер працягнуць судовую барацьбу і даказаць, што тое праўленне цэнтрабанка, што сядзіць пры Мадуры ў Каракасе - гэта адзіны законны распарадчык венесуэльскага залатога запасу.