«Жанчына перад адпачынкам выдаткуе вялізную суму»
58- 4.12.2021, 12:45
- 9,448
Беларуска расказала, колькі каштуе быць прыгожай.
Першай гераіняй цыкла «Без фільтраў» на сайце onliner.by стала Ірына. Дзяўчыне 31 год, жыве ў Менску ў здымнай кватэры, працуе эканамістам-аналітыкам за сярэднестатыстычны заробак і адносіць сябе да адэптаў натуральнай прыгажосці.
- Я ніколі не рабіла накладныя вейкі або перманентны макіяж, не павялічвала сабе вусны. Чаму? Банальна, але я навучылася любіць сябе такой, якая ёсць. Памятаю, калі была падлеткам, думала: вось пачну зарабляць і зраблю сабе трэці памер грудзей! А потым вырасла і зразумела, што мяне цалкам задавальняе свой. Другі нюанс: нашы дзяўчаты часта не ведаюць меры, і калі ўжо нешта робяць, то паводле прынцыпу «Няхай усе ведаюць, колькі я на гэта выдаткавала!». Калі вейкі, то ненатуральныя, як у лялькі; калі вусны - адразу «пяльмені» на паўтвару. Мне здаецца, гэтым дзяўчатам зламаў псіхіку Instagram, дзе вакол толькі ідэальныя пасля фільтраў твары і целы. А ўсе гэтыя блогеркі ў рэальнасці зусім іншыя!
Быць прыгожай выходзіць вельмі дорага, нават калі ты не робіш нічога звышнатуральнага. Гераіня падводзіць каштарыс для самых недаверлівых. Толькі на тры пастаянныя б'юці-працэдуры - манікюр, педыкюр і эпіляцыю - сыходзіць амаль 140 рублёў у месяц.
- Манікюр я раблю кожныя тры тыдні ў салоне ў сяброўкі, таму выходзіць танней: 40 рублёў за рукі і 45 рублёў - ногі. Сюды ж дадаем лазерную эпіляцыю (хвала таму, хто яе прыдумаў). Спачатку некалькі месяцаў рабіла 8 працэдур, а потым падтрымліваючыя – раз на некалькі месяцаў. І хаця адзін сеанс каштуе блізу 120 рублёў, лічу гэта адным з лепшых укладанняў у сябе, вельмі эканоміць час.
Уключаем у спіс абавязковых штомесячных працэдур масаж спіны (30 рублёў за 40 хвілін) і заняткі спортам (мінімум 120 рублёў у месяц). Са слоў Ірыны, гэта неабходна не для пахудання, а для здароўя і настрою.
— У мяне праз сядзячы лад жыцця пачаліся праблемы са спінай, таму стала хадзіць на стрэтчынг і масаж. Акрамя таго, спорт робіць больш шчаслівым і дазваляе трымаць сябе ў тонусе. Якой бы стомленай я ні выйшла з працы, пасля заняткаў рэзка з'яўляецца куча энэргіі на ўборку, гатаванне, мыццё і яшчэ шмат чаго. Нават не ведаю, адкуль энэргія бярэцца! Нядаўна скончыла двухмесячныя курсы плавання, за 16 заняткаў - 400 рублёў. Гэтыя курсы для мяне цалкам акупіліся: да гэтага я нават не ўмела трымацца на вадзе, а зараз лёгка плаваю кролем 400 метраў. Але гэта атрымалася толькі таму, што я па жыцці - камбайн, які ідзе напралом. Памятаю, на пачатку заняткаў выйшла з басейна, села ў машыну і заплакала, таму што гэтыя ўрокі плавання нагадалі ўсё маё жыццё: плывеш, захлынаючыся хлоркай, нягледзячы на стомленасць, а на наступны занятак зноў ідзеш з упэўненасцю, што зробіш гэта!
Хаця б раз у пару месяцаў дзяўчына дазваляе сабе правесці дзень у спа, таму што, працуючы на знос без адпачынку, доўга не працягнеш.
- Хоць і аддаеш 125 рублёў за дзень рэлаксу, але потым адчуванні, быццам нанова нарадзілася. Ёсць комплексы і таннейшыя, вядома, але гэта адзінае месца ў Менску, куды нельга прыходзіць з дзецьмі. Таму што немагчыма расслабіцца, калі побач нехта крычыць ці нырае бомбачкай.
На меркаванне нашай суразмоўцы, любіць сябе натуральнай не значыць проста дазволіць сабе старэць. Таму з нядаўняга часу грошы сталі сыходзіць яшчэ і на розныя прымочкі для адсоўвання маршчын на больш далёкую перспектыву. У першую чаргу ўсе гэтыя намаганні і пакуты - для сябе, а не каб радаваць нейкага абстрактнага мужчыну.
- Добрая касметыка - задавальненне таксама не з танных. У мяне сухая скура і схільнасць да алергіі, таму на крэмы сыходзіць шмат, і гэта я не самы дарагі сегмент бяру! Напрыклад, ласьён для цела каштуе 45 рублёў, шампунь і бальзам для валасоў - 150 рублёў, адзін слоічак крэму для твару - у сярэднім 50 рублёў. А ў любой дзяўчыны ёсць розныя слоічкі для кожнай часткі цела. Толькі для твару патрэбны начны і дзённы крэм, тонік, умывалка, крэм для павекаў і бальзам для вуснаў. Пакуль выканаеш гэты штодзённы рытуал, паўгадзіны пройдзе. Мне складана меркаваць, дзейнічаюць яны ці гэта проста маркетынг, але нічога не зробіш: час ужо пачаў працаваць супраць мяне.
«На догляд за сабой без фанатызму трэба мінімум 400 рублёў у месяц»
Паводле падлікаў Ірыны, на мінімальны догляд за сабой яна траціць не менш за 400 рублёў у месяц. І гэта без уліку выдаткаў на добрае харчаванне, якое перш за ўсё адбіваецца на твары.
- Значыць, на догляд за сабой без нейкага фанатызму і дарагіх працэдур трэба мінімум 400 рублёў у месяц. Без паходаў да касметолага і цырульніка, без розных ін'екцый прыгажосці, афарбоўкі броваў па 50 рублёў кожныя два тыдні… А паколькі я не маю багатага інвестара, то не магу дазволіць сабе аддаць на догляд некалькі заробкаў.
Да марнатраўцаў або празмерна эканомных яна сябе не адносіць, уважае, што знайшла свой баланс, расставіўшы прыярытэты.
- А прыярытэты з узростам (і пакупкай машыны) рэзка мяняюцца. Нядаўна я доўга разважала, ці магу дазволіць сабе сукенку за 400 рублёў, і вырашыла, што гэта нерацыянальна. А потым не міргнуўшы вокам аддала роўна столькі ж за два тармазных дыска для сваёй Audi. Цяпер гэта галоўны «пражора» ў маёй сям'і, - смяецца дзяўчына. - Я магу забыцца, што ў лядоўні няма прадуктаў, але дакладна не забуду заправіць аўто бензінам.
Дык, можа, любоў да прыроднай прыгажосці - гэта не светапогляд, а банальная эканомія? Пытаемся: калі б вам далі безліміт на ўсе бьюці-сродкі і працэдуры, куды б сышлі гэтыя грошы?
- Перш за ўсё я б пайшла да стаматолага і зрабіла сабе галівудскую ўсмешку, таму што ўсмешка вельмі важная. А па-другое, я заўсёды хацела займацца тэнісам, але ў Беларусі гэта выходзіць занадта дорага: арэнда корта — 60 рублёў за гадзіну, трэнер — яшчэ 35 за занятак, а дадай сюды яшчэ свае ракеткі і мячыкі, красоўкі для тэніса — дык увогуле не пацягнеш.
«Часам так і хочацца сказаць: Пратры вочы, Ален Дэлон ты чортаў!»
Ірына лічыць, што жанчыны даглядаюць за сабой нашмат больш старанна за мужчын з адной простай прычыны: сярод іх канкурэнцыя вышэйшая. Мужчына ж можа дазволіць сабе наогул не затлумляцца з нагоды сваёй лішняй вагі ці маршчын, таму што ім і такім зацікавяцца».
- У большасці сваёй мужчыны не моцна задумваюцца што да знешняга выгляду. За стрыжкай і барадой сочаць, на ўсё астатняе – не звяртаюць увагі. У нас ёсць цэлы пласт самаўпэўненых «самцоў» з піўным жыватом, зашмальцаванымі валасамі і адрослымі пазногцямі, якія не ўмеюць даглядаць ні за сабой, ні за дзяўчатамі, і пры гэтым не самотныя. Калі жанчына збіраецца на мора, яна пафарбуе валасы, зробіць свежы манікюр і педыкюр, нарасціць вейкі, пасядзіць месяц на дыеце, накупіць кучу сонцаахоўных крэмаў... А мужчына проста возьме з сабой плаўкі, двое трусоў і гаспадарчае мыла - і ўсё, гатовы прыгажун! Проста таму, што гендэрная перавага на іх баку: да 40 гадоў на аднаго мужчыну прыпадае тры жанчыны. Па гэтай жа прычыне жанчыны баяцца старасці і адзіноты, чапляючыся за такіх вось. Яны марнуюць цэлыя багацці на тое, каб не з'явілася лішняя маршчынка, праз якой муж яе потым разлюбіць і знойдзе маладзейшую. Вось гэтая барацьба і стварае ў выніку вечную гонку крэмаў і бьюці-працэдур, - уважае Ірына.
Яна прызнаецца, што яе нервуюць недагледжаныя мужчыны, якія не саромеюцца ацэньваць жанчын вакол: прыгожая ці не, вартая мяне ці не? Пры гэтым які-небудзь прыгажун будзе сядзець ціха ў кутку і не адважыцца пазнаёміцца.
- Дзяўчатам набраць вагу прасцей, а пасля цяжарнасці яшчэ паспрабуй ад яе пазбавіцца. Адсюль і пасляродавыя дэпрэсіі ў тым ліку, няўпэўненасць у сабе… А мужчына выпіў піўка, паляпаў сябе па пузіку і шчаслівы. І самае дзіўнае, што такія вось не саромеюцца ацэньваць дзяўчат вакол - вось у гэтай зубы дрэнныя, а гэтая тоўстая. Хочацца сказаць яму: «Пратры вочы, Ален Дэлон ты чортаў!» Мне б такую самаўпэўненасць.
Прыкладныя выдаткі на догляд за сабой у месяц:
спорт - 120 рублёў;
касметыка для твару і цела - 100 рублёў;
масаж - 60 рублёў;
саўна ці спа - 80 рублёў;
эпіляцыя - 60 рублёў;
манікюр - 40 рублёў;
педыкюр - 45 рублёў.
Разам: 505 рублёў.