Для наймальнікаў могуць перагледзець абавязковыя страхавыя ўнёскі ў ФСАН

Сталі вядомыя падрабязнасці магчымай навацыі.

Чыноўнікі анансавалі, што хочуць паэтапна ўкараняць «новую схему назапашвальнай пенсійнай сістэмы». Гаворка пра тое, каб работнік пры жаданні адлічваў да 3% ад свайго заробку і столькі ж дадаваў наймальнік. Пры гэтым для наймальнікаў могуць знізіць абавязковыя страхавыя ўнёскі. Tut.by пацікавіўся ў Міністэрстве працы драбніцамі магчымай навацыі.

Сцісла пра тое, пра што наогул ідзе гаворка

Чыноўнікі не першую пяцігодку гавораць пра тое, што трэба стымуляваць беларусаў самім адкладаць на дадатковую пенсію, а то і зрабіць назапашвальны элемент абавязковым для ўсіх. У планах на мінулую пяцігодку - 2016-2020 гады - было «далейшае развіццё добраахвотнага страхавання дадатковых пенсій у страхавых арганізацыях, у тым ліку шляхам стварэння роўных умоў для дзяржаўных і недзяржаўных страхавых арганізацый». Гэтая задача, можна сказаць, засталася нявыкананай. У Мінпрацы канстатуюць, што добраахвотнымі назапашвальнымі пенсіямі (як карпарацыйнымі, так і індывідуальнымі) ахоплена менш за 5% працоўных.

На гэту пяцігодку - 2021-2025 гады - чыноўнікі зноў маюць планы, каб стымуляваць беларусаў самастойна адкладаць на дадатковую пенсію.

Гаворка пра тое, каб сярод іншага паэтапна ўкараняць назапашвальную пенсійную сістэму. Прычым чыноўнікі хочуць зрабіць гэта за кошт як саміх работнікаў, так і наймальнікаў: «Работнік зможа пералічваць на свой асабовы пенсійны рахунак да 3% ад заробку, столькі ж дадасць і працадаўца». Прасцей кажучы, дзяржава прапануе беларусам для больш-менш забяспечанай старасці не толькі разлічваць на пенсіі ад ФСАН, у які адлічвалі ўнёскі ўсё працоўнае жыццё і ў якім існуе дэфіцыт, але і збіраць самастойна.

Як можа працаваць новая схема назапашвальнай пенсіі

У Міністэрстве працы расказалі, што праекта ўказа аб магчымых зменах у назапашвальнай пенсійнай сістэме яшчэ няма, «яго яшчэ трэба абмеркаваць з усімі зацікаўленымі старанамі».

- Добраахвотнае пенсійнае страхаванне ў нас і сёння існуе. Мы сёння маем дзве страхавыя кампаніі, якія займаюцца добраахвотным пенсійным страхаваннем - гэта «Стравіта» і «Прыёрлайф», - удакладніў намеснік міністра працы і сацыяльнай абароны Валерый Кавалькоў. - Сёння і працаўнікі, і самазанятыя, і прадпрымальнікі могуць страхавацца.

Гаворка пра тое, што кожны беларус можа ўкласці ў адной з гэтых кампаній умову на дадатковае назапашвальнае пенсійнае страхаванне. Прычым сума ўнёску можа быць усялякая. Зарэгістраваць на работніка такі поліс можа таксама наймальнік, пэўныя арганізацыі і прадпрыемствы так ужо робяць. Гэта як частка сацыяльнага пакету.

Цяпер жа ідзе гаворка пра тое, каб і працаўнік, і наймальнік адначасова займаліся назапашвальнай пенсіяй.

- Цяпер разглядаецца пытанне аб тым, што працаўнік будзе выплачваць нейкі ўнёсак, і наймальнік таксама за яго можа выплачваць нейкі ўнёсак. І каб унёсак быў сувымерным: калі работнік плаціць на яго 1%, то і наймальнік за яго 1%. Калі работнік - 3%, то і наймальнік за яго 3%. Але варыянт, што будзе больш за 3% ад наймальніка, пакуль нават не разглядаецца. Абвешчана 3%.

Гаворка пра тое, каб работнік пры жаданні мог да 3% ад свайго заробку пералічваць на дадатковую пенсію, столькі ж павінен будзе дадаць і наймальнік. І калі для першых гэта опцыя пры жаданні, то для наймальніка - абавязковая, калі работнік захоча атрымаць другую пенсію паводле такой схемы.

Але ў Мінпрацы звяртаюць увагу на тое, што «адна з задач - гэта непавелічэнне цяжару для самога наймальніка».

- Нават калі наймальнік будзе выплачваць за работніка нейкі страхавы тарыф на ахвотнае пенсійнае страхаванне, дадатковага націску на яго не мае быць, - мяркуе Валерый Кавалькоў. - Цалкам магчыма, што будуць зменшаныя абавязковыя страхавыя ўнёскі для наймальнікаў, якія будуць адлічваць сродкі на дадатковае пенсійнае страхаванне работнікаў.

Цяпер абмяркоўваецца сярод іншага, каб для наймальнікаў, якія будуць адлічваць ўнёскі на назапашвальную пенсію работніка, знізіць памер абавязковых унёскаў у ФСАН. Пры гэтым для работнікаў, якія будуць адлічваць на дадатковую пенсію паводле новай схемы, скарачэнне ўнёскаў у ФСАН не плануецца (цяпер працаўнік адлічвае 1% ад заробку ў ФСАН).

Плануецца, што новая назапашвальная пенсійная схема будзе працаваць праз страхавыя кампаніі. Гаворкі пра тое, каб зрабіць назапашвальную пенсію абавязковай, пакуль не ідзе, удакладнілі ў Міністэрстве працы.