90% ізраільцян атрымалі хаця б адну дозу COVID-вакцыны або ўжо перахварэлі

У вакцынацыі насельніцтва Ізраіль займае першае месца ў свеце.

90% ізраільцян, у якіх няма супрацьпаказанняў да COVID-вакцынацыі, атрымалі прынамсі адну дозу вакцыны Pfizer/BioNTech ці ўжо перахварэлі на каранавірус.

Пра гэта заявіў прэм'ер-міністр Ізраіля Беньямін Нетаньяху, паведамляе Reuters.

4 сакавіка Ізраіль, Аўстрыя і Данія заявілі, што створаць сумесны фонд даследаванняў і распрацовак і, магчыма, вытворчыя магутнасці для вакцын COVID-19, каб забяспечыць доўгатэрміновыя пастаўкі для паўторных прышчэпак або барацьбы з мутацыяй вірусаў.

«Мы будзем разам «краінамі вакцынацыі». І мы дамовіліся, што калі іншыя краіны захочуць далучыцца да нас, мы абмяркуем гэта паміж сабой і запросім іншых», - пракаментаваў дамоўленасць Нетаньяху.

Нагадаем, на 2 сакавіка 2021 года ў Ізраілі 52% дарослага насельніцтва цалкам прышчапілася вакцынай ад каранавіруса, што з'яўляецца найбуйнейшым паказчыкам у свеце.