Навукоўцы ў РФ паспрабавалі стварыць прэпарат для дыябетыкаў, але атрымалася гарэлка
20- 18.04.2021, 19:22
- 14,276
«Лекі» вынайшлі навукоўцы з Новасібірска.
Новасібірскія навукоўцы, Мікалай Баранаў і Аксана Афанасьева, выпадкова вынайшлі беспахмельную гарэлку, пакуль шукалі прэпарат для барацьбы з цукровым дыябетам.
Эфекту палягчэння пахмелля даследчыкам удалося дамагчыся дзякуючы экстрактам з лішайніку ягелю, запэўніваюць расейскія СМІ.
Новасібірскія распрацоўшчыкі ўжо атрымалі патэнт на тэхналогію вытворчасці гарэлкі, пры ўжыванні якой зніжаецца постінтаксікацыйнае дзеянне ў параўнанні са звычайным спіртным напоем.
Навукоўцы выдзелілі з ягелю алігацукрыды і дадалі іх у розныя вадкасці, у тым ліку ў гарэлку.
«Мы доўгія гады займаемся атрыманнем чагосьці сапраўды карыснага з такой расліннай сыравіны, як ягель. Ён досыць распаўсюджаны па поўначы, яго даўно вывучаюць. Нам з навукоўцамі з Якуцка і Новасібірскіх інстытутаў удалося атрымліваць з ягелю рэчывы, якія арганізмам будуць засвойвацца. Яны з'яўляюцца транспартам для іншых рэчываў, выступаюць як сарбент для розных злучэнняў», - адзначае адзін з аўтараў тэхналогіі Мікалай Баранаў.
Даследчыкі прапануюць дадаваць у водна-этанолавую сумесь, крэпасцю 40 градусаў, экстракт ягелю у суадносінах ад 1:150 да 1:200 долі. Метад паспяхова апрабаваны на пацуках, а ў сакавіку быў атрыманы і спецыяльны патэнт.
Згодна з гэтым дакументам, вынаходніцтва зніжае таксічнае і постінтаксікацыйнае ўздзеянне на 18-20 працэнтаў, а вось эйфарычны эфект цалкам захоўваецца. Паводле звестак трымальнікаў патэнта, гарэлка, створаная паводле гэтай тэхналогіі, на 20-33 адсоткі знізіць хуткасць фармавання алкагольнай залежнасці.
Зрэшты, пакуль аб прасоўванні распрацоўкі ў вытворчасць і на рынак казаць рана. Са слоў Мікалая Баранава, вытворцы, як правіла, імкнуцца да зніжэння сабекошту прадукту, а ў выпадку выкарыстання экстракту ягелю гарэлка толькі падаражэе.