Турцыя адпраўляе свідравыя судны на глыбакаводнае газавае радовішча ў Чорным моры

Што адбываецца?

Буравое судна Kanuni прыбыло на радовішча Сакарыя ў Чорным моры, дзе ўжо на працягу месяца працуе іншае турэцкае свідравое судна Fatih. Першае судна правядзе даследаванні зробленай раней свідравіны Türkali-2. Далей судна закончыць аналагічныя працы на свідравінах Türkali-1 і Tuna-1. У сваю чаргу Fatih на радовішчы Сакарыя вядзе будаўніцтва новай свідравіны Amasra-1. Таксама ў турэцкай эканамічнай зоне Чорнага мора на ўсход ад работ Фаціха прыбыло сейсмавыведвальнае судна Barbaros Hayreddin Pasa, гаворыцца ў паведамленні аўтара Telegram-канала «Газ-Бацюшка».

Радовішча Сакарыя было адкрыта ў жніўні 2020 года падчас свідравання звышглыбокай свідравіны Tuna-1. Запасы радовішча ацэньваюцца на 405 млрд кубаметраў газу. Здабычу газу на радовішчы Сакарыя Турцыя плануе пачаць у 2023 г., прымеркаваўшы гэтую падзею да святкавання стагоддзя рэспублікі. На працягу бліжэйшых гадоў на радовішчы плануецца прасвідраваць блізу 10 свідравін, а да 2028 года - павялічыць іх колькасць да 40.

Газ будзе пастаўляцца на бераг праз падводны газаправод працягласцю 150 км. На пачатковым этапе здабыча газу на радовішчы складзе 5-10 млрд кубаметраў на год, а да 2025 года Турцыя можа выйсці на аб'ём здабычы на 45 млрд кубаметраў за год, што ставіць у цяжкую сітуацыю экспарцёраў газу ў Турцыю, найперш Газпрам.

Закантрактаваны аб'ём паставак газу Газпрама ў Турцыю складае 28 млрд кубаметраў газу на год, пры гэтым у 2021 годзе ў кампаніі мінаюць доўгатэрміновыя кантракты з шэрагам прыватных турэцкіх пакупнікоў на агульны аб'ём 8 млрд кубаметраў на год. Пакупнікі ўжо кіўнулі Газпраму, што хочуць атрымаць больш камфортныя ўмовы паставак газу паводле кантрактаў. Больш за тое, турэцкая дзяржкампанія Botas не падоўжыла кантракт нават з BP-Azerbaijan, аператарам праекта Шах-Дэніз-1, з-за чаго былі спыненыя пастаўкі газу па магістральным газаправодзе Баку - Тбілісі - Эрзурум. З улікам таго, што Азербайджан з'яўляецца для Турцыі значна большым партнёрам, чым Расея, можна ўявіць, што чакае Газпрам.