МЗС Польшчы выклікала кіраўніка амбасады Беларусі ў Варшаве

Польскія ўлады запатрабавалі тлумачэння слоў генпракурора Беларусі Андрэя Шведа.

Польскія ўлады запатрабавалі тлумачэння слоў генеральнага пракурора Беларусі Андрэя Шведа, паведамляе «Радыё Свабода» са спасылкай на wnp.pl.

Андрэй Швед раней заяўляў, што «атрыманая інфармацыя пра жывых нацысцкіх злачынцаў, якія бралі ўдзел у дзеяннях карных батальёнаў падчас вайны на тэрыторыі Беларусі». Швед адзначыў, што «ў першую чаргу гэта тычыцца літоўскіх батальёнаў СС і Арміі Краёвай», у сувязі з чым у Літву і Польшчу будуць накіраваныя даручэнні аб наданні «прававой дапамогі».

У МЗС Польшчы мяркуюць, што апошнія крокі беларускіх уладаў у галіне гістарычнай памяці зыходзяць не з Менска, але мяркуюць, што Беларусь абвастрае стасункі з Польшчай і Захадам для фармавання іміджу вонкавага ворага. Сваю пазіцыю з гэтай нагоды МЗС Польшчы давяло да часовага паверанага ў справах Беларусі ў Варшаве.

«Міністэрства замежных спраў папрасіла тлумачэнняў аб тым, ці з'яўляюцца заявы генеральнага пракурора публіцыстычнымі ці адлюстроўваюць афіцыйную пазіцыю беларускіх уладаў і з'яўляюцца новымі кіроўнымі прынцыпамі ў дачыненнях з Польшчай», - заявілі ў МЗС Польшчы.