Кіраўнік МЗС Польшчы: Лёс Беларусі можа змяніць банкруцтва Лукашэнкі

Жаданне свабоды, калі яно ўзнікае, заўсёды спраўджваецца.

Лёс Беларусі можа змяніць банкруцтва Лукашэнкі. Такое меркаванне ў інтэрв'ю газеце Rzeczpospolita выказаў міністр замежных спраў Польшчы Збігнеў Раў.

Паводле ягоных слоў, прастора для манэўру ў Аляксандра Лукашэнкі звужаецца, таму для сваёй легітымізацыі ён выкарыстоўвае супрацоўніцтва з Расеяй. Раў мяркуе, што рана ці позна Масква запатрабуе плаціць за рахункі.

«Чым больш Аляксандр Лукашэнка не прымаецца грамадствам, тым больш звужаецца ягоная прастора для манеўру. Ён ужо ведае, што не верне сімпатыі беларусаў і не мае іх паўнамоцтваў вызначаць будучыню краіны. Такім чынам, ён павінен пазычаць гэты мандат у Расеі. Пазыкі трэба вяртаць, і настане час выплаты», - сказаў ён.

Раў упэўнены, што банкруцтва Лукашэнка набліжаецца і менавіта яно можа змяніць лёс краіны. Пры гэтым міністр не ўдакладніў, што маецца на ўвазе пад «банкруцтвам».

«Таму лёс Беларусі можа змяніць банкруцтва Лукашэнкі. Мы набліжаемся да яго з кожным днём. У нашай частцы Еўропы жаданне свабоды, калі яно ўзнікае, заўсёды спраўджваецца. Мы проста не ведаем гэтага часу. Маладыя беларусы не змірацца з тым, што ўсё астатняе жыццё будуць жыць пад уладай, якая не мае паўнамоцтваў прымаць пастановы аб сваёй будучыні», - сказаў польскі чыноўнік.

Кіраўнік замежнапалітычнай установы таксама пацвердзіў, што Польшча захоўвае каналы сувязі з беларускімі ўладамі. У выніку былі вызваленыя тры актывісткі польскай меншасці ў Беларусі. Што да лёсу лідараў звязу палякаў, то іх вызваленне залежыць ад шматлікіх умоў, а таксама ад іх уласнага жадання пакінуць Беларусь.

"Так. Яны дазволілі вызваліць трох жанчын-дырэктараў польскіх школ. Што да лёсу іншых палякаў у турме, то гэта вынік спалучэння шматлікіх умоў. А таксама ці хочуць яны пакінуць Беларусь», - адзначыў міністр.

Раў таксама запэўніў, што беларускія актывісты знаходзяцца ў бяспецы ў Польшчы.