У Расеі «зліваюць» сотні мільярдаў з бюджэту для стрымлівання коштаў бензіну

Нафтавыя кампаніі атрымаюць буйныя датацыі за кошт падаткааплатнікаў.

Дзярждума ў сераду прыняла ў трэцім, канчатковым чытанні закон, які змяняе рэгуляванне коштаў паліва ў Расеі, паведамляе finanz.ru.

Ініцыяваны ўрадам дакумент уносіць карэктывы ў параметры дэмпфера - дзейнага з 2018 года механізму, закліканага стабілізаваць кошты бензіну і дызельнага паліва.

Сістэма, уведзеная ў адказ на бензінавы крызіс 3-гадовай даўніны, працуе наступным чынам: калі экспартныя кошты бензіну і дызельнага паліва вышэйшыя за ўмоўныя ўнутраныя, то дзяржава кампенсуе вытворцам частку гэтай розніцы; у зваротным выпадку нафтакампаніі пералічваюць частку прыбытку ў бюджэт.

Гэты механізм функцыянуе і цяпер: да прыкладу, у сакавіку нафтавікі атрымалі 16,6 млрд рублёў з бюджэту па дэмпферу і яшчэ 46,9 млрд праз зваротны акцыз. Але ўтрымаць паліўную інфляцыю, зашытую ў кошт усіх тавараў і паслуг, не ўдаецца.

За паўгода біржавыя кошты на Аі-92 падскочылі на 20,8%, а на Аі-95 - на 27,5%, а раздробныя выраслі - на 6% і 7% адпаведна.

Новая формула дэмпфера павялічыць выплаты нафтавікам з бюджэту на Br350 млрд рублёў у 2021-23 гадах, вынікае з тлумачальнай запіскі да закона.

Для гэтага індыкатыўны кошт бензіну, адносна якога разлічваюцца выплаты, будзе зніжана на 4 тысячы рублёў за тону, да 52,3 тысячы рублёў на гэты год; на 3,8 тысячы рублёў - на наступны год (да 59 тысяч рублёў за тону) і на 4,1 тысячы рублёў на 2023 год (да 62 тысяч рублёў за тону).

Адначасова ўлады разглядаюць і больш жорсткія захады, каб астудзіць паліўны рынак, дзе кошты растуць у 1,5 разы хутчэй інфляцыі.

Віцэ-прэм'ер Аляксандр Новак, які курыруе энэргетыку, на мінулым тыдні даручыў прапрацаваць магчымасць пагаднення аб замарожванні коштаў з нафтавымі кампаніямі па аналогіі з тым, як гэта было зроблена ў канцы 2018 года.

Акрамя таго, разглядаецца магчымасць поўнай забароны на экспарт бензіну і павелічэнне нарматыву продажаў паліва на біржы, які цяпер складае 11%.