З 1 ліпеня уехаць у РФ з Беларусі можна будзе з дапамогай дадатку
5- 18.06.2021, 20:13
- 24,880
Дадатак называецца «Падарожнічаю без COVID».
Выкарыстоўваць мабільны дадатак абавязкова павінны будуць людзі, якія прыязджаюць у Расею з краін-сябраў ЕАЭС, а з 1 верасня - і грамадзяне СНД, піша «РИА Новости».
Цяпер у дадатку ў акне «краіна адпраўлення» даступныя шэсць краін: Арменія, Беларусь, Казахстан, Кыргызстан, Расея і Таджыкістан. Іх жа можна паказаць у акне «краіна прыбыцця».
Беларусь далучылася да праекту ЕАЭС «Падарожнічаю без COVID-19» у сакавіку 2021 года. Перадаваць звесткі ў сістэму будзе Нацыянальны цэнтр электронных паслуг ва ўзаемадзеянні з беларускім Міністэрствам аховы здароўя.
Мабільны дадатак «Падарожнічаю без COVID-19» быў створаны Еўразійскім банкам развіцця, ён дазваляе хутка знайсці пералік верыфікаваных лабараторый, здаць тэст на каранавірус, вынікі якога патрапяць у агульную з ЕАЭС сістэму. Пасля гэтага грамадзянін, які атрымаў адмоўны тэст, зможа бесперашкодна перамяшчацца паветраным транспартам у межах ЕАЭС.
Спампаваць дадатак можна бясплатна на Google Play і App Store.