Украіна і ЕЗ падпісалі мемарандум аб стратэгічным партнёрстве ў сыравіннай галіне

Патэнцыял у $400 млрд за 10 гадоў.

Украіна і Еўрапейскі звяз 13 ліпеня ўклалі мемарандум аб стратэгічным партнёрстве ў сферы крытычнай сыравіны і акумулятараў і склалі дарожную мапу мерапрыемстваў. Пра гэта паведамляецца на сайце Кабінета міністраў Украіны.

Дакумент падпісалі прэм'ер-міністр Украіны Дзяніс Шмыгаль і віцэ-прэзідэнт Еўракамісіі Мараш Шаўчовіч.

«Мы дамаўляемся аб'ядноўваць нашы намаганні і дзейнічаць з ЕЗ згуртавана для развіцця зялёнай эканомікі, стварэння новых бізнэс-магчымасцяў і працоўных месцаў», - сказаў Шмыгаль.

Са слоў Шаўчовіча, у гэтым плане стратэгічнае партнёрства з Украінай у сыравіннай галіне мае велізарны патэнцыял.

Шмыгаль у сваю чаргу падкрэсліў, што за кошт нарошчвання ўласнай вытворчасці «мінералаў будучыні» і паліўна-энэргетычных карысных выкапняў, павелічэння экспарту, а таксама скарачэння імпарту мінеральнай сыравіны, «патэнцыял эфектыўнага выкарыстання нетраў Украіны можа скласці больш за $400 млрд у наступныя 10 гадоў».

З яго слоў, комплексная распрацоўка крытычнай сыравіны ўжо на першым этапе можа прыцягнуць ва Украіну да $10 млрд інвестыцый.

Гэта другое пасля энэргетычнага партнёрства Украіны з ЕЗ, адзначыў Шмыгаль на брыфінгу. «У рамках рэалізацыі абноўленай прамысловай стратэгіі ЕЗ, плана дзеянняў Еўракамісіі аб крытычна важнай сыравіне і шэрагу іншых дакументаў Украіна можа стаць важным элементам еўрапейскай эканамічнай прасторы», - сказаў прэм'ер Украіны.

Віцэ-прэзідэнт Еўракамісіі адзначыў у Twitter, што гэтая дамоўленасць умацуе палітычныя сувязі, падасць шэраг магчымасцяў для прамысловасці як ЕЗ, так і Украіны, дапамагаючы ствараць працоўныя месцы на мясцовым узроўні, звязаныя з пераходам да зялёных і лічбавых тэхналогій.

Каб рэалізаваць гэтае партнёрства, ЕЗ выдзеліць Украіне сёлета дадатковыя €750 тысяч. У рамках тэхнічнай дапамогі для падтрымкі нарошчвання патэнцыялу. У наступным годзе гэтая сума павінна павялічыцца.