Украіна ўвяла новыя правілы ўезду ў краіну
9- 5.08.2021, 12:04
- 12,226
Што змянілася з 5 жніўня?
Пастанова аб увядзенні шэрагу абмежаванняў была прынятая Кабінетам Украіны ў ліпені, піша avianews, яна пачала дзейнічаць 5 жніўня.
Для перасячэння мяжы цяпер трэба будзе здаць тэст на COVID-19 і адбыць самаізаляцыю на працягу дзесяці ці чатырнаццаці дзён.
Адлік самаізаляцыі пачынаецца праз 72 гадзіны пасля прыбыцця ва Украіну. На мабільнай прыладзе ў абавязковым парадку трэба ўсталяваць спецыяльны дадатак «Вдома». Без яго ў краіну ўкраінскія памежнікі не пусцяць.
Для замежных грамадзян абавязковым застаецца страхавы поліс і адзін з трох дакументаў: адмоўны ПЦР-тэст/экспрэс-тэст, зроблены не больш як за 72 гадзіны да ўезду, ці даведка аб поўнай вакцынацыі.
Тым не менш самаізаляцыя не будзе патрэбная замежнікам са страхавым полісам і дакументам, які пацвярджае поўную вакцынацыю.
Поўная вакцынацыя павінна быць праведзеная адным з прэпаратаў, уключаных САЗ у спіс дазволеных або быць названым у адной з міжнародных дамоў аб узаемным прызнанні дакументаў пра вакцынацыю ад каранавіруса або аб узаемным прызнанні COVID-сертыфікатаў, удакладняе Дзяржаўная памежная служба Украіны.
Для ўезду ва Украіну замежнікаў і грамадзян Украіны з Расеі і Індыі дзейнічаюць асаблівыя правілы. Яны таксама распаўсюджваюцца на тых людзей, якія былі ў Расеі ці Індыі 7 дзён за апошнія 14 дзён.
Гэтыя людзі павінны прайсці двухтыднёвую самаізаляцыю без права спыніць яе датэрмінова. Гэта звязана з шырокім распаўсюджваннем штаму «дэльта».
Штам «дэльта»
Дэльта-штам каранавіруса SARS-CoV-2 - адзін з штамаў віруса SARS-CoV-2, узбуджальніка COVID-19. Упершыню выяўлены і апісаны ў Індыі. У яго выяўлена мутацыя, у выніку вірус стаў больш заразным.
Перадача адбываецца ў розных узроставых групах. Інкубацыйны перыяд складае не 3-7 дзён, а 1-3 дня. Таксама адзначаецца падвышаная вірусная нагрузка. Перыяд вывядзення ўзбуджальніка з арганізма складае 13-15 дзён, у той час як для іншых штамаў ён складае 7-9 дзён.
Выклікае прастудныя сімптомы ў цяжкай форме, уключаючы недамаганне, падвышаную тэмпературу, мігрэнь, боль у горле, кашаль і рыніт. Рызыка шпіталізацыі ў параўнанні з альфа-штамам вышэйшая ў 1,85 раза.