Андрэй Саннікаў: Рэжым Лукашэнкі стаў праблемай міжнароднай бяспекі

Прыйшоў час прымаць адпаведныя пастановы.

Лідар грамадзянскай кампаніі «Еўрапейская Беларусь» Андрэй Саннікаў зрабіў заяву ў сувязі з «мігранцкай» вайной, развязанай супраць Літвы рэжымам Лукашэнкі.

- Перакіданне нелегальных мігрантаў на тэрыторыю Літвы з тэрыторыі Беларусі - гэта арганізаваная рэжымам Лукашэнкі ваенная аперацыя супраць Літвы і ўсяго Еўразвязу.

Няма сумненняў, што гэтыя дзеянні спланаваныя і арганізаваныя з дапамогай спецслужбаў рэжыму пры ўдзеле экстрэмісцкіх груповак ісламістаў, пра што сведчаць нядаўнія пагрозы тэрактаў у Літве, якія распаўсюджваюцца праз электронную пошту.

Няма сумненняў таксама, што рэжым Лукашэнкі рыхтуе новыя правакацыі і эскалацыю напружанасці на межах суседніх з Беларуссю дзяржаў і ў саміх гэтых дзяржавах.

Праблема мірнай Беларусі - дыктатарскі рэжым - даўно выйшла за межы нашай краіны і стала праблемай міжнароднай бяспекі. Да яе варта ставіцца менавіта як да такой і прымаць адпаведныя пастановы, не ўважаць тое, што адбываецца, за гуманітарны крызіс і не спадзявацца на яго мірнае ўрэгуляванне з дапамогай палавінчатых захадаў.

Больш за 25 гадоў Еўропа спрабавала залагоджваць Лукашэнку, шукала ў ім пробліскі здаровага сэнсу і нават геапалітычнага партнёра. Усе гэтыя спробы спрыялі ўзнікненню ў цэнтры Еўропы нябачанага па сваіх маштабах ачага гвалту, задушвання свабоды і рэпрэсій. Спыніць усё гэтае беззаконне, які цягне за сабой гібель людзей, можна толькі рашучымі захадамі на ўзроўні ўсяго Еўразвязу і асацыяваных з ім краін, ЗША і Канады.

Злачынствы супраць чалавечнасці, што чыняцца рэжымам Лукашэнкі, спыняцца адразу ж пасля ліквідацыі гэтага незаконнага злачыннага рэжыму.

Сітуацыя з нелегальнымі мігрантамі на мяжы з Літвой павінна паслужыць перагляду занадта паблажлівай палітыкі Еўразвязу ў дачыненні да агрэсіўнага і некіруемага дыктатара.

• У ЕЗ даўно варта было б стварыць спецыяльную працоўную групу (ad hoc group) высокага ўзроўню аб сітуацыі ў Беларусі, надзеленую паўнамоцтвамі прымаць тэрміновыя палітычныя, эканамічныя, юрыдычныя пастановы, уключна з увядзеннем санкцый і арыштам усіх рахункаў злачынцаў, звязаных з рэжымам Лукашэнкі.

Міграцыйная вайна на мяжы з Літвой набывае яшчэ больш пагрозлівы характар у сувязі з запланаванымі на верасень гэтага года вучэннямі «Захад-21». Гэтыя найбуйнейшыя манеўры праводзяцца на тэрыторыі Беларусі на ініцыятыву і пад кіраўніцтвам Крамля. Непрадказальнасць і нестабільны псіхічны стан дыктатара Лукашэнкі робіць гэтыя манеўры вельмі небяспечнымі. Іх правядзенне на тэрыторыі Беларусі не толькі непажаданае, але і проста злачыннае.

• Кіраўніцтву NATO варта было б запатрабаваць ад Крамля скасавання гэтых вайсковых манеўраў у мэтах прадухілення росту напружанасці ў рэгіёне, што аб'ектыўна адпавядае і інтарэсам Масквы. У кожным выпадку расейскае кіраўніцтва павінна быць папярэджанае пра сваю адказнасць за ўсе правакацыі і эскалацыю агрэсіі ў перыяд падрыхтоўкі і правядзення «Захаду-21».

Грамадзянская кампанія «Еўрапейская Беларусь» нязменна бароніць прынцыпы еўрапейскага шляху развіцця нашай краіны, добрасуседства і паважлівага стаўлення да ўсіх дзяржаў. Менавіта за абарону гэтых прынцыпаў сёння ў турмах паводле сфабрыкаваных абвінавачванняў знаходзяцца лідары «Еўрапейскай Беларусі» Яўген Афнагель, Паліна Шарэнда-Панасюк, Максім Вінярскі, Павал Юхневіч і іншыя. Мы рашуча патрабуем з неадкладнага вызвалення, «Еўрапейская Беларусь» уважае цяперашні рэжым за незаконны, а яго дзеянні за злачынныя. Ніякія правакацыі і агрэсія Лукашэнкі ў дачыненні да Літвы і іншых дзяржаў, якія мяжуюць з Беларуссю, не зменіць паважлівага і сяброўскага стаўлення беларусаў да суседзяў і іншых народаў.

Менавіта на аснове ўзаемнай павагі і вяршэнства міжнароднага права будуць будавацца міжнародныя стасункі свабоднай і незалежнай Беларусі, - гаворыцца ў заяве, апублікаванай на сайце «Еўрапейскай Беларусі».