У Гародні спыненыя турбіны энэргаблока, які сілкаваў і стратэгічныя прадпрыемствы горада
12- 5.08.2021, 15:35
- 39,398
Спецыялісты з Брытаніі адмаўляюцца прыязджаць для іх рамонту.
На Гарадзенскай цеплаэлектрастанцыі (ГТЭС) спыніўся другі энэргаблок. Яго немагчыма запусціць зноў, бо брытанскія спецыялісты адмаўляюцца прыязджаць для рамонту.
Пра гэта паведамляе стачкам «Гродна-Азоту»:
- Трохі аб непрацуючых санкцыях.
ГТЭС, другі энэргаблок першай чаргі спынены 5 красавіка 2021 года з прычыны зносу лапатак сілавой турбіны. Грошай на закуп і аплату працы ангельскім спецыялістам Siemens няма.
Другі энэргаблок 2-й чаргі быў спынены на планавы рамонт 14 траўня 2021 на два тыдні. Па заканчэнні тэрміну рамонту не змаглі запусціць турбіну ў нармальны рэжым.
Была прынятая пастанова чакаць спецыялістаў з Siemens для наладкі турбіны, бо ў гэтай турбіны быў зроблены капітальны рамонт у сакавіку гэтага года (быў пастаўлены новы турбакампрэсар) і яна знаходзіцца на гарантыі.
Але, спецыялісты з Англіі не прыязджаюць - санкцыі ці, можа, каранавірус...
Прыехалі спецыялісты з Расеі, за 6 дзён не змаглі знайсці аб'ектыўную прычыну няправільнай працы турбіны. Змаглі запусціць з рознымі парушэннямі, без магчымасці кіраваць нагрузкай турбіны. Калі турбіна спыніцца з якіх-небудзь прычын, запусціць яе зноў наўрад ці атрымаецца.