У кіраўніка Міністэрства аховы здароўя Бразіліі на Генасамблеі ААН выявілі каранавірус

Тэст паказаў станоўчы вынік пасля таго, як ён суправаджаў прэзідэнта Жаіра Балсанару.

У міністра аховы здароўя Бразіліі Марсэла Кейрогі выявілі каранавірус.

Як паведамляе Reuters, тэст паказаў станоўчы вынік праз некалькі гадзінаў пасля таго, як ён суправаджаў прэзідэнта Жаіра Балсанару на Генасамблеі ААН у Нью-Ёрку.

Кейрога знаходзіцца на карантыне і пакуль адчувае сябе добра.

Ва ўсіх астатніх чальцоў дэлегацыі тэст на каранавірус адмоўны.

Кейрога адзначыў, што знаходзіўся ў будынку ААН у ахоўнай масцы ўвесь час. Ці быў ён вакцынаваны, не паведамляецца.

Міністр стаў другім чальцом бразільскай дэлегацыі ў Нью-Ёрку, у якога быў знойдзены станоўчы вынік. Малады дыпламат, які ўваходзіў у склад перадавой групы ў падрыхтоўцы візіту Балсанару, здаў станоўчы тэст у выхадныя і быў ізаляваны.

Характэрна, што прэзідэнт Бразіліі Жаір Балсанару са скепсісам ставіцца да вакцынацыі ад COVID-19. Ён аргументуе сваю адмову ад вакцынацыі тым, што ў яго натуральным чынам з'явіліся антыцелы пасля перанесенай каранавіруснай хваробы.