У Беларусі з-за COVID-19 спыненыя прафілактычныя медагляды

Лякарні і паліклінікі перавялі на асаблівы рэжым працы.

Прафілактычныя медагляды прыпыненыя ў Беларусі. Пра гэта гаворыцца ў загадзе Міністэрства аховы здароўя №1141 ад 21 верасня.

Выключэнне складаюць медыцынскія агляды, якія праводзяцца ў парадку, устаноўленым Інструкцыяй аб правядзенні абавязковых і пазачарговых медаглядаў працоўных, зацверджанай пастановай Міністэрства аховы здароўя №74 ад 29 ліпеня 2019 года, паведамляе БелТА.

Правядзенне прафілактычных медыцынскіх аглядаў прыпыняецца да «стабілізацыі эпідэміялагічнай сітуацыі з COVID-19». Згодна з дакументам, прымаць пастанову аб прыпыненні і (або) аднаўленні планавай шпіталізацыі ў бальнічных арганізацыях будуць на месцах самастойна з улікам эпідэміялагічнай сітуацыі і магчымасцяў арганізацый аховы здароўя.

Паліклінікі і шпіталі пераходзяць на рэжым працы ў эпідэміялагічны перыяд, абумоўлены павышэннем захворвання на COVID-19.

Што тычыцца РНПЦ, яны прадоўжаць працаваць у звычайным рэжыме з улікам профілю надання спецыялізаванай медыцынскай дапамогі.