Гандлёвы прадстаўнік Украіны: Нашым вытворцам лепш шукаць альтэрнатывы беларускага рынку
3- 22.09.2021, 15:59
- 4,292
Тарас Качка параіў не гандляваць з рэжымам Лукашэнкі.
Украінскім вытворцам на найбліжэйшы час лепш не будаваць сваю бізнэс-стратэгію на доступе на рынак Беларусі праз непрадказальнасць палітычнай сітуацыі, якая будзе ўплываць і на гандаль.
Як паведамляе «Еўрапейская праўда», такое меркаванне выказаў гандлёвы прадстаўнік Украіны Тарас Качка.
«З Расеяй і, на жаль, Беларуссю нам трэба разумець, і бізнэсу разумець, што будаваць стратэгію на доступе на гэты рынак - гэта абсалютна непрадказальна», - адзначыў Тарас Качка.
Ён адзначыў, што ніхто не можа гарантаваць, што Беларусь раптам не ўвядзе новыя санкцыі праз незадаволенасць якой-небудзь заявай Украіны.
«Калі палітычны дыскурс у Беларусі будзе развівацца так, як ён развіваецца, то, на жаль, гэта будзе дзяржава, не толькі куды мы не раім падарожнічаць праз фізічную небяспеку, але і з якой мы не раім гандляваць - нягледзячы на тое, што гэта сапраўды наш рынак, у нас там вельмі шмат спажыўцоў. Думаю, у наступныя некалькі гадоў сітуацыя пагоршчыцца, таму шукаць альтэрнатыўныя рынкі можа быць найлепшай стратэгіяй», - сказаў гандлёвы прадстаўнік.
Ён дадаў, што Украіна з гэтай нагоды кансультуецца з Літвой, якая таксама мела цесныя эканамічныя сувязі з Беларуссю.