У Беларусі працягваюць падаць рэальныя пенсіі

А яшчэ за жнівень краіна страціла больш за 29 тысяч пенсіянераў.

У Беларусі працягваюць зніжацца рэальныя пенсіі, якія разлічваюць з папраўкай на рост коштаў. У жніўні, як і ў ліпені, яны знізіліся на 3,6% да аналагічнага месяца летась, паведамляе Белстат. Гэта рэкорднае зніжэнне гэтых выплат. Падзенне пенсій шмат у чым звязана з разгонам гадавой інфляцыі, якая істотна перавышае прагнозныя паказчыкі, паведамляе zerkalo.io.

Сярэдне прызначаная сума пенсій у жніўні склала 484,9 рубля (гэта на 1,5 рубля больш, чым у ліпені).

Пры гэтым прыкметна скарацілася колькасць пенсіянераў. Калі на канец ліпеня, паводле звестак Белстата, іх налічвалася 2 мільёны 454,5 тысячы, то ў канцы жніўня - на 29,2 тысячы менш. Для параўнання: у 2020 годзе за аналагічны перыяд скарачэнне колькасці пенсіянераў было меншым - 5,8 тысячы.

Чыноўнікі не першы год спрабуюць падняць суадносіны сярэдняй пенсіі па ўзросту і сярэдняга заробку да 40%, але выканаць гэта калі і атрымліваецца, то толькі ў асобныя месяцы.