Расейскі мільярдэр: Быў момант, калі Пуцін хацеў з'ехаць у Гішпанію

Сяргей Пугачоў пераказаў адну з размоў, якая адбыўся паміж ім і кіраўніком Крамля ў 1999 годзе.

У канцы 1990-х цяперашні прэзідэнт РФ Уладзімір Пуцін задумваўся пра эміграцыю. Пра гэта ў інтэрв'ю заснавальніку інтэрнэт-выдання «Гордон» Дзмітрыю Гардону распавёў расейскі бізнэсовец, былы член Савета Федэрацыі РФ, былы блізкі сябар Пуціна Сяргей Пугачоў, які знаходзіцца ў вышуку на радзіме, жыве ў Францыі і судзіцца з Расеяй у Гаазе праз актывы коштам $15 млрд.

Пугачоў і Пуцін пазнаёміліся ў пачатку 1990-х гадоў, а блізка мець стасункі пачалі ў 1996-м. Са слоў бізнэсоўца, з Пуціным з канца 1990-х і прыкладна да 2010 года яны праводзілі вельмі шмат часу разам і гутарылі практычна штодня. У СМІ Пугачова называлі «банкірам Крамля» і «банкірам Пуціна».

Бізнэсовец пераказаў адну з размоў, якая адбыўся паміж ім і Пуціным у 1999 годзе. У той час Пуцін займаў пасаду дырэктара Федэральнай службы бяспекі РФ.

«Ён мне кажа: «Сканчайце гэтыя інтрыгі. Мне ўжо надакучыла. Я ні туды, ні сюды». Я нават, памятаю, натхніўся: ён дырэктар ФСБ, падпалкоўнік: «Давай мы табе прысвоім генерал-палкоўніка!» А ён кажа: «Ды ты што! Божа барані. Ні ў якім разе». Я думаю: «Вось усё ж чалавек сціплы... «А ён мне кажа: «Я потым за мяжу выехаць не змагу». Ён у Гішпанію хацеў з'ехаць», - распавёў Пугачоў.

З ягонай інфармацыі, у Пуціна ў Гішпаніі быў дом.

«Ну хтосьці, мабыць, калісьці купіў. Я там не быў. Проста памятаю апавяданні, як там добра: на моры домікі і гэтак далей. Мабыць, гэта яшчэ ў часы, калі (Пуцін у 1990-1996 гадах працаваў у мэрыі Санкт-Пецярбурга ў камандзе Анатоля Сабчака. - заўв.)», - выказаў меркаванне бізнэсовец.

Прыкладна ў гэты ж час, са слоў Пугачова, які ў той час уваходзіў у найбліжэйшае атачэнне прэзідэнта РФ Барыса Ельцына, ён правёў з Пуціным размову і прапанаваў яму заняць пасаду прэм'ер-міністра. Спачатку, на ўспаміны бізнэсоўца, Пуцін ад гэтай прапановы адмовіўся.

«Я сказаў: «Валодзя, пад'язджай на плошчу, пагаворым». Ён прыехаў. «Ёсць такая ідэя...» - «Авантура. Якое прэм'ерства?» Гаворка ішла не пра прэзідэнцтва. Я сказаў: «Валодзя, [тагачасны старшыня ўрада РФ Сяргей Сцяпашын] - усё...Давай, наперад! А там паглядзім. Можа, яшчэ што-небудзь будзе». Ён адказаў: «Барані Божа», - успомніў Пугачоў.

У выніку пасля нарады з удзелам Ельцына Пуцін усё ж прыняў прапанову ўзначаліць урад РФ, а ў снежні 1999 года ў сувязі з датэрміновым сыходам Ельцына ў адстаўку Пуцін стаў в.а. прэзідэнта краіны. У сакавіку 2000 года на прэзідэнцкіх выбарах у РФ ён быў абраны кіраўніком дзяржавы, атрымаўшы больш за 50% галасоў.