У Латвіі праз завіруху не могуць прызямліцца самалёты

Тысячы жыхароў краіны засталіся без святла.

У панядзелак, 17 студзеня, сіноптыкі абвясцілі ў Латвіі чырвонае папярэджанне - ураганны вецер зрывае дахі і валіць дрэвы, аэрапорт фактычна закрыты, тысячы чалавек засталіся без электрычнасці, паведамляе «Еўрапейская праўда».

У панядзелак у сярэдзіне дня парывы ветру ў Юрмале дасягалі 32 метраў за секунду, у Даўгаўгрыве і Кундзінсалі ў Рызе - 30 метраў за секунду, сведчаць звесткі метэастанцый. Такой моцнай буры ў Рызе не было са студзеня 2005 года.

У Ліепайскім і Вентспілскім партах у панядзелак зарэгістраваны парывы ветру да 27 і 29 метраў за секунду.

Да абеду Дзяржаўная пажарна-выратавальная служба (VUGD) атрымала 100 выклікаў аб паваленых на тратуары і праезную частку дрэвах і сарваных дахах. Большасць выклікаў атрымалі ў Рызе і Юрмале.

Прадпрыемства Rīgas Meži папярэдзіла аб небяспецы знаходжання ў гарадскіх парках, а таксама ў лясах.

Пасля абеду без электрычнасці засталося амаль 7000 кліентаў прадпрыемства Sadales tīkls, большасць з якіх знаходзяцца ў заходняй частцы Латвіі.

Праз непагадзь у Рызе са спазненнем курсуе грамадскі транспарт.

Рыжскі аэрапорт у Twitter паведаміў, што з пагаршэннем варункаў надвор'я многія рэйсы затрымліваюцца, а многія - перанакіроўваюцца ў аэрапорты іншых краін. Пасажыраў заклікаюць сачыць за інфармацыяй аб статуце свайго рэйса на хатняй старонцы авіякампаній і рыжскага аэрапорта.

Цяпер вядома аб зменах пяці маршрутаў - рэйс Wizz Air з Кіева, а таксама рэйсы AirBaltic з Брусэля, Франкфурта, Дубая і Парыжа.