У Буда-Кашалёўскім раёне чыноўнікаў і бюджэтнікаў адправілі ўручную ратаваць ураджай кукурузы

Іх адправілі на забалочаныя палеткі, "каб тэхніку не ламаць".

Чыноўнікі сельскіх выканкамаў, вяскоўцы і бюджэтнікі дапамагаюць аграрыям Буда-Кашалёўскага раёна ўручную сабраць ураджай кукурузы на зерне з забалочаных дзялянак палеткаў, куды не можа дабрацца тэхніка. Справаздачу аб працы "працоўнага дэсанту" апублікавала мясцовая газэта «Авангард».

Ураджай працаўнікі ратавалі на палетках за вёскамі Калінінам і Забалаццем. Апроч працаўнікоў аграрнага прадпрыемства, да збору кукурузы далучыліся супрацоўнікі сельскіх выканкамаў, тутэйшыя жыхары і прадстаўнікі бюджэтных арганізацый.

У распараджэнні ахвотных памагатых былі вёдры і мяхі, "у якія збіраліся катахі", удакладніў "Авангард".

Слесар сельскагаспадарчых машын СУП "Андрэеўка" Рыгор Арцёмкаў расказаў выданню, што дзялянкі наважылі прыбраць уручную, "каб тэхніку не ламаць".