Пуціна не запрасілі на інаўгурацыю Такаева ў Казахстане
7- 26.11.2022, 13:02
- 23,834
На цырымоніі таксама не было кіраўнікоў іншых дзяржаваў АДКБ.
У Казахстане 26 лістапада адбылася інаўгурацыя Касыма-Жамарта Такаева. Палітык другі раз узначаліў краіну. Больш балатавацца на выбарах кіраўніка дзяржавы ён не зможа.
На цырымоніі прысутнічаў першы прэзідэнт Казахстана Нурсултан Назарбаеў. Верхаводы АДКБ і Уладзімір Пуцін на інаўгурацыю не прыязджалі, паведамляе 24tv.ua.
Што паабяцаў Такаеў
На інаўгурацыі прысутнічалі дзяржаўныя дзеячы, а з міжнародных палітыкаў – амбасадары. Так сама было і падчас першай інаўгурацыі Такаева ў 2019 годзе.
Сваю прамову Такаеў гаварыў на казахскай мове. Ён падкрэсліў, што выбары прайшлі «сумленна і справядліва».
«Урачыста клянуся служыць народу Казахстана, строга выконваць Канстытуцыю і законы, гарантаваць правы і свабоды грамадзянаў, добрасумленна выконваць ускладзеныя на мяне высокія абавязкі прэзідэнта Рэспублікі Казахстан», – заявіў Такаеў.
Пасля гэтага кіраўнік Цэнтральнай выбарчай камісіі Нурлан Абдзіраў уручыў Такаеву пасведчанне прэзідэнта.
Новапрызначаны кіраўнік краіны акрэсліў захады, якія хоча рэалізаваць падчас сваёй кадэнцыі:
рэалізацыя канстытуцыйнай рэформы;
развіццё вёскі;
мінімізацыя ўсіх перашкодаў, якія ўзнікаюць на шляху малога і сярэдняга бізнэсу;
абнаўленне галінаў улады і г.д.
Першыя ўказы Такаева
Пра канцэпцыю развіцця сельскіх тэрыторый на 2023–2027 гады;
пра захады ў рэалізацыі перадвыбарнай праграмы прэзідэнта «Справядлівы Казахстан – для ўсіх і для кожнага. Цяпер і назаўжды»;
пра захады ў вяртанні дзяржаве незаконна выведзеных актываў;
прызначэнне на 14 студзеня 2023 г. выбараў дэпутатаў сената парламенту;
пра некаторыя пытанні найвышэйшай аўдытарскай палаты Казахстана.
Дарэчы, сярод краінаў, супрацоўніцтва з якімі з'яўляецца прыярытэтным для Казахстана, Такаеў назваў Расею. Маўляў, у фокусе ўвагі будуць пытанні ўзаемавыгаднага супрацоўніцтва з суседнімі дзяржавамі – Расеяй, Кітаем і краінамі Цэнтральнай Азіі.
Акрамя таго, Такаеў плануе прыкласці максімальныя намаганні для развіцця супрацоўніцтва з ЗША, ЕЗ, дзяржавамі Азіі, Блізкага Усходу і Закаўказзя, а таксама з усімі зацікаўленымі краінамі.