Ва ўсёй Украіне была абвешчаная трывога праз узлёт знішчальнікаў МіГ-31 у Беларусі

Знішчальнікі пасля «некуды паляцелі».

Сёння, 1 снежня, паветраная трывога па ўсёй Украіне была абвешчаная праз узлёт знішчальнікаў МіГ-31 у Беларусі, якія пасля «некуды паляцелі». Пра гэта ў эфіры нацыянальнага тэлемарафона паведаміў прадстаўнік Паветраных сіл Узброеных Сіл Украіны Юры Ігнат.

Паводле папярэдняй інфармацыі, як сказаў Ігнат, трывогі былі дзеля МіГ-31, якія ўзняліся ў неба ў Беларусі і "некуды паляцелі".

Ён падкрэсліў, што для Украіны не мае асаблівага значэння перасоўванне авіяцыі з тэрыторыі Беларусі, бо ракеты "Кінжал", якія нясе МіГ-31, могуць ляцець і не з тэрыторыі Беларусі, а "адкуль хочаш".

«Тое, што яны знаходзіліся ў Беларусі, для нас асаблівага стратэгічнага значэння не мае. Магчыма, гэта быў больш знак для краін Захаду побач з Беларуссю – Польшчы, краін Балтыі. Знаходжанне МіГ-31 у гэтым рэгіёне - магчыма, гэта такі ціск на краіны Захаду», - выказаў меркаванне Ігнат.

Ён таксама паведаміў, што расейцы павялічылі актыўнасць тактычнай авіяцыі апошнія некалькі дзён. Сёння назіралася актыўнасць да 30 расейскіх самалётаў на часова акупаванай тэрыторыі Украіны, у акваторыі Чорнага мора і ў РФ.

«Гэта тактычная авіяцыя - не стратэгічная. Гэтыя самалёты былі накіраваныя, відавочна, на падтрымку наземных войскаў РФ, а таксама, магчыма, для нанясення ўдараў кіраванымі ракетамі», - растлумачыў вяшчальнік Паветраных сіл.