Камітэт дзяржаўнага кантролю Беларусі ўзяўся за праверку падарункавых сэртыфікатаў

КДК высвятляе, ці маюць яны «тэрмін прыдатнасці».

Камітэт дзяржаўнага кантролю Беларусі ўзяўся за падарункавыя сэртыфікаты. Ва ўстанове спрабуюць разабрацца, ці ёсць так званы тэрмін прыдатнасці ў падарункавых сэртыфікатаў, інфармуе прэсавая служба КДК.

У КДК Гомельскай вобласці задалі пытанне, наколькі справядлівым з'яўляецца той факт, што падарункавыя сэртыфікаты нельга рэалізаваць пасля таго, як у іх скончыўся тэрмін прыдатнасці.

Адзначаецца, што шмат якія арганізацыі гандлю і выканання паслуг у якасці падарунка прапануюць купляць менавіта падарункавыя сэртыфікаты. Згодна з заканадаўствам, гэтыя сэртыфікаты могуць быць бестэрміновымі або выдавацца на працяглыя тэрміны. Прадаўцы, у сваю чаргу, могуць прадугледжваць парадак і ўмовы іх падаўжэння.

Ва ўстанове заўважаюць, што гэта адбываецца толькі "ў тэорыі", а на вось на практыцы дзеянні падарункавых сэртыфікатаў абмежаваныя тэрмінамі, ад 2 да 6 месяцаў, і не маюць магчымасці падаўжэння.

Каб высветліць, наколькі гэта справядліва і чаму правы прадаўцоў мацней абароненыя, чым правы спажыўцоў, Камітэт дзяржкантролю прыняў пастанову правесці гарачую лінію 15-16 снежня гэтага года.

Паведамляецца, што на «гарачую лінію» беларусы могуць паведаміць звесткі аб праблемных пытаннях, якія ў іх узнікаюць падчас рэалізацыі падарункавых сэртыфікатаў. У тым ліку, аб адмовах арганізацый гандлю і паслуг у іх падаўжэнні або вяртанні грашовых сродкаў у тым выпадку, калі ягоны ўладальнік мае на гэта аб'ектыўныя прычыны.

Акрамя таго, камітэт таксама цікавіць меркаванне і прадстаўнікоў суб'ектаў прадпрымальніцтва, якія рэалізуюць тавары праз падарункавыя сэртыфікаты, аб праблемах у гэтай сфэры дзейнасці і шляхах іх развязання.