Што будзе, калі змаўчаць аб зламаным лічыльніку вады ці не здаць прыбор на паверку ў тэрмін

Замена прыбораў уліку ажыццяўляецца бясплатна.

Штомесяц у кол-цэнтр «Водазбыту» «Мінскводаканала» паступае ад 8 да 10 тысяч заявак на планавую замену прыбораў уліку водаспажывання. Чаму вельмі важна рабіць гэта своечасова, як запісацца на паверку, чым небяспечны пропуск міжпаверачнага перыяду, расказала падчас жывой тэлефоннай лініі ў кантакт-цэнтры Менгарвыканкама начальніца кол-цэнтра «Водазбыту» Таццяна Кузняцова, паведамляе карэспандэнт агенцтва «Минск-Новости».

Як правіла, міжпаверачны перыяд складае 5 гадоў, зразумела, успомніць, калі прыходзілі спецыялісты ў мінулы раз і час запрашаць іх зноў, даволі складана. Варта звярнуць увагу, што тэрмін паверкі паказваецца ў дамове на водазабеспячэнне і ў пашпарце самога вадамера. Таксама ўбачыць тэрмін паверкі можна на паверачнай пломбе прыбораў уліку, на якіх паказваецца месяц і год усталявання. Акрамя таго, аб тым, што тэрмін чарговай паверкі падыходзіць, «Мінскводаканал» нагадвае пры дапамозе аўтаабзвону спажыўцоў.

- Калі падыходзіць тэрмін замены прыбораў уліку вады, варта патэлефанаваць у наш кол-цэнтр на кароткі нумар 119 або гарадскі 289-42-98 і дамовіцца аб прыдатнай даце і часе візіту спецыялістаў. Замена прыбораў уліку ажыццяўляецца бясплатна, - удакладніла Т. Кузняцова.

На жаль, не ўсе ставяцца да пытання паверкі добрасумленна. За што потым плацяць. Суразмоўніца падкрэсліла: лічыльнікі вады, якія не прайшлі своечасова паверку, рамонт, або замену, здымаюцца з уліку. А налічваць аплату за водазабеспячэнне і водаадвядзенне ў такіх кватэрах пачынаюць па нарматывах спажывання, якія складаюць 12 м3 гарачай і халоднай вады сумарна за месяц на кожнага зарэгістраванага ў жылым памяшканні. Нагадаем, актуальны тарыф на паслугу «халоднае водазабеспячэнне» складае 1,0922 руб/м3, на водаадвядзенне - 0,6867 руб/м3. Гэта значыць, за кожнага зарэгістраванага жыхара ў гэтым выпадку давядзецца плаціць больш за 13 рублёў за ваду і звыш 8 рублёў за каналізацыю.

- Гараджанам таксама заўсёды варта звяртаць увагу на карэктнасць працы прыбораў уліку водаспажывання. Калі чалавек выявіць, што лічыльнік не лічыць, трэба звярнуцца ў наш кол-цэнтр для ўзгаднення замены прыбора. У гэтым выпадку разлік платы за паслугі водазабеспячэння і водаадвядзення паводле нарматываў будзе праведзены толькі за разліковы перыяд. Гэта значыць, напрыклад, калі жыхар звярнуўся з такой праблемай у траўні, то па нормах спажывання яму пералічаць толькі за перыяд з 1 траўня і да моманту ўсталявання спраўнага лічыльніка. Калі ж няспраўнасць выявяць нашы кантралёры, пераразлік выканаюць за перыяд з апошняй зверкі паказанняў прыбораў уліку, але не больш за 3 гады. За такі тэрмін налічыцца даволі буйная сума, якую грамадзяніну давядзецца аплаціць, - патлумачыла Т. Кузняцова.

Яна таксама падкрэсліла, што кожны месяц у Менску здымаюць з камерцыйнага ўліку да 300 адрасоў. Гэта акурат тыя выпадкі, калі гараджане не запісаліся на паверку ў тэрмін.