Супраць Сцяпана Пуцілы і Яна Рудзіка ў Беларусі распачалі новую крымінальную справу

У чым вінавацяць стваральніка сеткавага рэсурсу NEXTA?

Супраць стваральніка рэсурсу NEXTA Сцяпана Пуцілы і аднаго з удзельнікаў праекту Яна Рудзіка ў Беларусі распачатая новая крымінальная справа. Іх абвінавачваюць у «арганізацыі і кіраўніцтве дзейнасцю тэрарыстычнай арганізацыі» (ч.1 арт.290-5 КК РБ). Пра гэта паведамляе БелТА са спасылкай на Следчы камітэт Беларусі.

Нагадаем, рэсурс NEXTA, а таксама NEXTA Live і LUXTA былі прызнаныя ў Беларусі спачатку экстрэмісцкім фармаваннем, а затым і тэрарыстычнай арганізацыяй. З красавіка 2022 года яе дзейнасць на тэрыторыі Беларусі забароненая.

Раней супраць Сцяпана Пуцілы ў Беларусі ўжо было распачатая некалькі крымінальных спраў. Яшчэ ў 2020 годзе яму выставілі абвінавачванні ва «ўчыненні наўмысных дзеянняў, накіраваных на распачынанне сацыяльнай варожасці па прыкмеце прафесійнай прыналежнасці» (ч.3 арт.130 КК РБ), а таксама ў «арганізацыі масавых беспарадкаў» (арт. 293 КК РБ) і у «арганізацыя групавых дзеянняў, якія груба парушаюць грамадскі парадак» (арт.342).

Беларуская пракуратура звярталася да калег у Польшчы з просьбай выдаць Сцяпана Пуцілу. Аднак атрымала адмову.