Беларусы прадаўжаюць ігнараваць транспартны падатак

Колькі кіроўцаў байкатуюць аплаты?

На днях МПЗ Віцебскай вобласці апублікавала статыстыку аб транспартным падатку, пра які, здаецца, многія ўжо забыліся - прынамсі, да канца восені. Сёлета трэба будзе заплаціць не пазней за 15 лістапада (81 рубель для стандартнай легкавушкі). А ў 2021-м неабходна было ўнесці аванс - меншую, чым стандартная аплата, суму (29 рублёў). Але і на такія марнаванні пайшлі не ўсе. Колькі неаплатнікаў у краіне? Паспрабуем экстрапаліраваць на аснове звестак з Віцебскай вобласці, піша onliner.by.

У Віцебскай вобласці бязмала 9,5 тысячы аплатнікаў транспартнага падатку не ўнеслі авансавую аплату, выстаўленую ў 2021 годзе, на суму 301,6 тысячы рублёў, паведамляе БелТА са спасылкай на абласную падатковую інспекцыю. Паводле звестак, агучаных Белстатам раней, у Віцебскай вобласці зарэгістравана 197 тысяч аўтаўладальнікаў, у іхняй уласнасці прыблізна 215 тысяч аўто. Лічым: неаплатнікаў - амаль 4,8 адсотка ад агульнай колькасці гаспадароў аўто ў Віцебскай вобласці.

Віцебскую вобласць разглядаем невыпадкова. Справа ў тым, што менавіта ў гэтым рэгіёне забяспечанасць аўтамабілямі насельніцтва максімальна набліжаная да сярэдняга значэння па краіне. Паводле інфармацыі на канец 2020-га, там былі 334 легкавушкі на кожную тысячу насельніцтва, пры гэтым усяго па Беларусі гэтае значэнне роўнае 335 аўтамабілям.

А цяпер вернемся да экстрапаляцыі: перанясем 4,8 адсотка тых, хто адмовіўся ад выплаты падатку (у Віцебскай вобласці) на ўсю краіну. На 2020 год усяго ў РБ было зарэгістравана блізу 3 094 600 аўтамабіляў. Выходзіць, маглі праігнараваць транспартны падатак прыкладна 149 тысяч аўтаўладальнікаў. Падкрэслім, гэтыя вылічэнні не варта ўспрымаць з навуковага пункта гледжання. Тым больш, што паводле афіцыйных звестак, аванс за транспартны падатак унеслі 98,5% аўтаўладальнікаў краіны.