Банк Расеі пазапланава знізіў ключавую стаўку да 11%

Пастанову прынялі на экстранным пасяджэнні рады дырэктараў.

Цэнтрабанк Расеі знізіў ключавую стаўку з 14 да 11%, гаворыцца ў паведамленні рэгулятара. Такую пастанову ён прыняў на пазапланавым пасяджэнні рады дырэктараў, правядзенне якога анансаваў днём раней, паведамляе РБК.

Гэта трэцяе запар зніжэнне ключавой стаўкі за апошнія паўтара месяца пасля яе рэкорднага - і таксама пазапланавага - павышэння да 20% у лютым. Тады ЦБ рэзка ўзмацніў жорсткасць за грашова-крэдытную палітыку, рэагуючы на абвал рынкаў, санкцыі ў дачыненні да найбуйнейшых банкаў і замарозку золатавалютных рэзерваў рэгулятара, якія рушылі ўслед за пачаткам вайны Расеі супраць Украіны.

У красавіку Цэнтрабанк РФ ужо зніжаў ключавую стаўку двойчы. На пазапланавым пасяджэнні 8 красавіка - з 20 да 17%, а таксама з 17 да 14% - на планавым, якое адбылося 29 красавіка.