27 лiстапада 2022, Нядзеля, 1:04
Сім сім, Хартыя 97!
Рубрыкі

«Улюбёнец» Пуціна і патэнцыйная цэль УСУ ў Крыме

2
«Улюбёнец» Пуціна і патэнцыйная цэль УСУ ў Крыме

Як РФ спрабуе «прыкрыць» Керчанскі мост.

Для расейскай улады Крымскі мост - ледзь не праект стагоддзя. Для Пуціна, які прыехаў на яго адкрыццё асабіста, мост праз Керчанскую пратоку ў анэксаваны Крым ператварыўся ў прадмет асабістага гонару. Самы доўгі ў Еўропе, хваліўся прэзідэнт Расеі, аглядаючы пабудаваны адцінак аўтадарожнай трасы ў 2018 годзе. Пуцін тады сеў за стырно КамАЗа і праехаў па трасе, не прышпіліўшыся. Па дарозе старанна пытаўся пра глыбіню глею, якая месцамі, як яму распавялі, дасягала дваццаці метраў, піша «Настоящее время».

Чалавек, які пабудаваў Крымскі мост, - мільярдэр Аркадзь Ратэнберг, блізкі сябар Уладзіміра Пуціна. У дзяцінстве яны разам займаліся дзюдо. А ў 2020 годзе Пуцін уручыў Ратэнбергу званне Героя Працы за асаблівыя заслугі - будаўніцтва моста. Расейскае выданне «Проект» высветліла, што сябар Уладзіміра Пуціна стаў уладальнікам вялікай колькасці аб'ектаў на анэксаваным узбярэжжы Крыма.

Што тычыцца моста, то 19-кіламетровы транспартны пераход праз Керчанскую пратоку быў пабудаваны за тры з паловай гады і каштаваў бюджэту 228 млрд рублёў. Або прыкладна $3,6 млрд сярэднім курсам за гады будаўніцтва. Для параўнання: меркаваны палац Уладзіміра Пуціна пад Геленджыком, паводле падлікаў Фонду барацьбы з карупцыяй апазіцыйнага палітыка Аляксея Навальнага, каштаваў прыкладна мільярд даляраў.

Крымскі мост каштаваў як тры з паловай прэзідэнцкія палацы: «Ён чаго носіцца вось так са сваім мостам? У краіне за дваццаць гадоў нічога не пабудавалі, але мост сапраўды ёсць, вось ён і ператварыўся ў скрэпу і галоўны сімвал».

Супраць збудавання Крымскага моста выступалі ва Украіне і Еўразвязе. ЕЗ увёў санкцыі супраць шасці расейскіх кампаній, якія бралі ўдзел у будаўніцтве. У Брусэлі мяркуюць, што мост, які злучыў анэксаваны Крым і Расею, «падрывае тэрытарыяльную цэласнасць, суверэнітэт і незалежнасць Украіны».

Адкрыццё аўтадарожнай часткі Крымскага моста забяспечыла бесперабойную пастаўку розных тавараў у Крым і назад. Скараціліся тэрміны дастаўкі грузаў на паўвостраў, што было важна для будаўнічай галіны. Цэмент, друз, пясок - усё вязуць з Расеі. Фура з грузам з Масквы і Маскоўскай вобласці даходзіць у Крым за два-тры дні. Без моста патрэбны тыдні.

Але цяпер Крымскі мост - важны аб'ект у вайне. Па гэтай артэрыі расейскае войска забяспечваюць на поўдні Украіны. Расея перакідвае тэхніку, боепрыпасы і вайскоўцаў. Для абароны Крымскага моста задзейнічаныя сілы Паўднёвай вайсковай акругі і Чарнаморскага флоту, а таксама берагавая ахова: дзяжураць марскія часткі пагранвойскаў і Расгвардыі. Колькасць СПА, якая ахоўвае мост, сакратар Рады нацыянальнай бяспекі і абароны Украіны Аляксей Данілаў ацаніў як «шалёную».

Расейская сенатарка Савета Федэрацыі Вольга Кавіцідзі расказала, што мост ахоўваецца з паветра двума палкамі СПА. У іх на ўзбраенні зенітныя ракетныя комплексы С-400. З яе слоў, яны ствараюць над Крымам своеасаблівы купал дыяметрам 400 кіламетраў. Таксама ёсць дадатковая абарона сістэмамі СПА найбліжэйшага дзеяння. Сярод іх - зенітныя комплексы «Панцыр-З».

У ліпені стала вядома, што супрацьракетную абарону моста ўзмацнілі баржамі з кутнімі адбівальнікамі. Ці стукнуць УСУ па Крымскім мосце, які для Украіны стаў сімвалам акупацыі, ва ўкраінскіх СМІ абмяркоўваецца не першы месяц. Сакратар РНБА Аляксей Данілаў яшчэ ў красавіку казаў, што такі сцэнар магчымы. Прэс-сакратар Пуціна Дзмітрый Пяскоў тады назваў гэтыя словы анансаваным тэрактам.

Спампоўвайце і ўсталёўвайце мэсэнджар Telegram на свой смартфон або кампутар, падпісвайцеся (кнопка «Далучыцца») на канал «Хартыя-97».