CNN: Контрнаступленне УСУ ў Харкаўскай вобласці стала самым маштабным з 24 лютага

Узяцце Ізюма адкрывае ўкраінскаму войску новыя магчымасці на Данбасе.

Вызваленне Узброенымі сіламі Украіны Ізюма ў Харкаўскай вобласці сведчыць аб выніковасці контрнаступлення Кіева, піша CNN.

«Уваходжанне ўкраінскіх войскаў у Ізюм - не проста буйная перамога, а прыкмета таго, што вайна ва Украіне можа перайсці ў новую фазу», - гаворыцца ў матэрыяле.

На гэтай фазе расейскія захопнікі будуць вымушаныя абараняцца і спрабаваць утрымаць тэрыторыі, захопленыя з пачатку ўварвання.

«Украінскае войска правяло самы маштабны наземны наступ з пачатку поўнамаштабнага ўварвання Расеі. Падчас наступу наносіліся бесперапынныя ўдары па камандных пунктах, складах боепрыпасаў і паліва далёка за лініяй фронту», - гаворыцца ў матэрыяле.

Высокапастаўлены амерыканскі чыноўнік распавёў журналістам, што ўкраінскія вайскоўцы «дабіліся пэўнага поспеху» ў атаках на лініі забеспячэння РФ, накіраваных на ізаляцыю групоўкі расейскіх войскаў на захад ад Дняпра.

«Відаць, Украіна адкрыла новы фронт супраць абароны расейскіх войскаў на мяжы Данецкай і Луганскай абласцей», - адзначаецца ў матэрыяле.

На думку кіраўніка Луганскай АВА Сяргея Гайдая, новай мэтай украінскіх вайскоўцаў стане захоплены расейцамі Лісічанск.