ЕЗ адрэагаваў на візіт Лукашэнкі ў самаабвешчаную Абхазію
17- 29.09.2022, 15:01
- 10,768
Брусэль заявіў аб парушэнні тэрытарыяльнай цэласнасці Грузіі.
ЕЗ катэгарычна асуджае візіт Лукашэнкі ў непрызнаную Абхазію і ўважае гэта за парушэнне міжнароднага права. Такую заяву зрабіў падчас брыфінгу ў Брусэлі афіцыйны прадстаўнік знешнепалітычнай службы Еўразвязу Петэр Стана.
– Мы катэгарычна асуджаем візіт Аляксандра Лукашэнкі ў Абхазію… Расцэньваем гэта як парушэнне суверэнітэту, тэрытарыяльнай цэласнасці Грузіі і парушэнне міжнароднага права, – сказаў Стана.
28 верасня 2022 года Лукашэнка прыехаў у Абхазію і сустрэўся з кіраўніком самаабвешчанай рэспублікі Асланам Бжаніяй.
Адзначым, што сепаратыстаў з Абхазіі, якія абвясцілі квазідзяржаву на тэрыторыі Грузіі, прызнаюць толькі Расея, Нікарагуа, Венесуэла, Наўру, Сірыя.