У Гомелі затрымалі сама меней шэсць чалавек

Дашлі і да ведамства Шуневіча.

Гомельскія сілавікі паведамілі пра чарговае затрыманне беларусаў за каментары і рэакцыі «экстрэмісцкага» зместу, піша «Наша Нiва».

З відэа, якое публікуе адзін з праўладных каналаў, вынікае, што затрымана сама меней шэсць чалавек.

На відэа адзін з затрыманых кажа, што пісаў абразлівыя каментары «на адрас Расеі і расейцаў». Яшчэ адзін мужчына кажа, што на ягонай старонцы знайшлі «экстрэмісцкія» публікацыі, дзве жанчыны кажуць, што былі падпісаныя на «экстрэмісцкія» каналы.

Некаторых з іх затрымлівалі непасрэдна на працоўным месцы.

На адным з кабінетаў заўважная шыльда: «Намеснік старшыні Кацур Аляксей Міхайлавіч», гэта значыць затрыманні адбыліся ў абласным аддзяленні «Беларускага таварыства паляўнічых і рыбаловаў». Таварыства ўзначальвае былы міністр унутраных спраў Ігар Шуневіч.