У Варшаве пахавалі беларускага добраахвотніка Эдуарда Лобава

З героем развітваліся пад бел-чырвона-белымі сцягамі.

Сёння на варшаўскіх могілках Ваенныя Павонзкі (Cmentarz Wojskowy na Powązkach) пахавалі беларускага добраахвотніка Эдуарда Лобава, які загінуў у баях пад украінскім Вуглядарам. Тыдзень таму ў касцёле Святога Аляксандра прайшла цырымонія развітання з героем.

На пахаванні прысутнічалі лідар руху салідарнасці «Разам» Вячаслаў Сіўчык, кіраўнік «Вольнай Беларусi» Зянон Пазняк, галоўная рэдактарка сайта Charter97.org Наталля Радзіна, прэзідэнт Фонду міжнароднай салідарнасці Рафал Дзенцялоўскі, амбасадар Польшчы ў Беларусі Артур Міхальскі, актывісты беларускай і ўкраінскай дыяспар у Варшаве. Вёў паніхіду душпастыр беларускіх католікаў у польскай сталіцы ксёндз Вячаслаў Барок.

Маці Эдуарда Лобава Марына падзякавала прысутным і падзялілася ўспамінамі пра сына:

- Ён быў вельмі пазітыўным, будаваў планы на жыццё. Эдзік да апошняга спадзяваўся, што дачакаецца перамогі Украіны ў вайне. Ён хацеў жыць, але на ўкраінскую зямлю прыйшлі расейскія акупанты і забралі ягонае жыцьцё.

На пахаванні выступала ўдава загінулага ўкраінскага сябра Эдуарда Лобава Святлана Стасюк:

- Эдуард быў уваходны ў нашу сям'ю. Ён быў нашым сябрам і запомніўся добрасумленным і добрым чалавекам. Героем, які бараніў не толькі Беларусь, але і Украіну. Ён той чалавек, на якога трэба раўняцца. Вельмі шкада, што Эдуард мала пажыў. Хачу падзякаваць вам ад імя ўсіх украінцаў, якія штодня змагаюцца за мірнае неба над галавой. За тое, каб не чуць гуку сірэн і ўбачыць канец гэтай праклятай вайны, якая забірае не толькі воінаў, але і мірных жыхароў. Я хачу падзякаваць родным і блізкім Эдуарда за тое, колькі ён усяго зрабіў для Украіны. Павага вашаму сыну. Героі не паміраюць!

У сваёй прамове пасол Польшчы ў Беларусі Артур Міхальскі зазначыў, што Эдуард Лобаў — герой трох народаў — польскага, беларускага і ўкраінскага:

- Справа свабоды - наша агульная. Барацьба з расейскім імперыялізмам – гэта наш гістарычны лёс і, на жаль, сённяшняя рэальнасць.

Ваенныя Павонзкі - гэта месца, куды мы, палякі, прывыклі прыходзіць і аддаваць гонар тым, хто абараняў нашу Айчыну. Гэта прыдатнае месца, дзе герой Беларусі, які ваюе за свабоду, можа супакоіцца. Я глыбока веру ў тое, што твая любая Радзіма, Эдуард, будзе вольнай.

Лідар «Вольнай Беларусi» Зянон Пазняк узгадаў, як загінуў беларускі добраахвотнік:

- Вядома, што падчас бою ён прыкрываў свайго камандзіра. Гасподзь сказаў, што вялікая павага да таго, хто паклаў жыццё за сяброў сваіх. Вось такім быў Эдуард Лобаў.

У гэты сумны дзень мы развітваемся з нашым ваяром, але не будзем плакаць. Мужчыны павінны разумець, што расейскі Мордар павінен быць разбіты. Усю нашу сілу, энэргію, інтэлект трэба накіраваць на тое, каб гэтая вайна скончылася, а Украіна перамагла. Аддамо гэта ўсё для нашай перамогі і будзем памятаць тых, хто загінуў за нас і нашу будучыню.

Блізкі сябар Эдуарда Лобава, маладафронтавец Андрэй Цянюта заклікаў распаўсюджваць петыцыю, якую запусціў камандзір загінулага добраахвотніка. Іван Завяршынскі заклікае прысвоіць Эдуарду Лобаву званне Героя Украіны. Адпаведная петыцыя створаная на сайце прэзідэнта Украіны.

Лідар руху салідарнасці «Разам» Вячаслаў Сіўчык узгадаў падзеі Плошчы-2010, калі Эдуард Лобаў быў затрыманы сілавікамі:

- Злачынствы, якія чыніліся супраць беларусаў, не могуць мець тэрміна даўнасці. Злачынцы, якія захапілі і трымалі Эдуарда чатыры гады, павінны будуць адказаць. Гэта павінны пачуць усе, зло павінна быць пакаранае.

Таксама на пахаванні выступіў прадстаўнік Беларускай аўтакефальнай праваслаўнай царквы. Ён зачытаў спіс беларусаў, якія загінулі на вайне ва Украіне.

У заключным слове ксёндз Вячаслаў Барок заклікаў беларусаў не ісці на кампрамісы са злом, працягваць змагацца за свабоду, як гэта рабіў Эдуард Лобаў.

Даведка

Беларускі добраахвотнік Эдуард Лобаў загінуў 26 студзеня, абараняючы Вуглядар. Ён служыў у 72-й асобнай механізаванай брыгадзе, удзельнічаў у вызваленні Кіеўскай вобласці і Чарнобыля ад расейскіх акупантаў.

Эдуард Лобаў - былы палітвязень. Ён быў затрыманы 18 снежня 2010 года разам з лідарам «Маладога фронту» Змітром Дашкевічам, а затым незаконна асуджаны на чатыры гады калоніі строгага рэжыму. Эдуард цалкам адбыў свой тэрмін у калоніі «Ваўчыныя норы».

Эдуард Лобаў ваяваў ва Украіне з 2015-га года.

У 2014 годзе сайт Charter97.org абвясціў яго лаўрэатам Нацыянальнай прэміі ў галіне абароны правоў чалавека імя Віктара Івашкевіча.