28 траўня 2024, aўторак, 10:59
Падтрымайце
сайт
Сім сім,
Хартыя 97!
Рубрыкі

МЗС Польшчы выклікала часовага паверанага ў справах Беларусі пасля прысуду Пачобуту

МЗС Польшчы выклікала часовага паверанага ў справах Беларусі пасля прысуду Пачобуту

Журналіста прысудзілі да васьмі гадоў калоніі ўзмоцненага рэжыму.

Павераны ў справах Беларусі ў Варшаве Аляксандр Часноўскі 8 лютага быў выкліканы ў Міністэрства замежных спраў Польшчы пасля вынясення прысуду журналісту Анджэю Пачобуту.

“Мы не ўважаем прысуд за справядлівы. (…) Мы прыкладзём усе законныя намаганні, якія могуць прычыніцца да ягонага вызвалення», - заявіў прадстаўнік МЗС Польшчы Лукаш Ясіна.

Даўней МЗС Польшчы назвала вырак суда Пачобуту несправядлівым і заклікала вызваліць журналіста.

"Палітычна матываваны паказальны працэс і сённяшні прысуд з'яўляюцца яскравым сведчаннем антыпольскіх дзеянняў беларускіх улад", - гаварылася ў заяве.

Нагадаем, сёння Гарадзенскі абласны суд прысудзіў журналіста, сябра пазбаўленага рэгістрацыі беларускімі ўладамі Звязу палякаў Беларусі Анджэя Пачобута да 8 гадоў калоніі ўзмоцненага рэжыму.

Андрэй Пачобут знаходзіцца за кратамі з 25 сакавіка 2021 года. Разам з ім былі затрыманыя і іншыя актывісты Саюза палякаў: Ірэна Бярнацкая, Марыя Цішкоўская, Ганна Панішава і Анжаліка Борыс.

У чэрвені таго ж года траіх з пяцярых затрыманых (Панішаву, Цішкоўскую і Бернацкую) выслалі ў Польшчу. Анджэй Пачобут і Анжаліка Борыс ад вызвалення ў абмен на дэпартацыю адмовіліся. Журналіст знаходзіцца ў зняволенні дагэтуль, а вось кіраўніцу Звязу палякаў Беларусі Анжаліку Борыс 25 сакавіка 2022-га выпусцілі з ізалятара пад хатні арышт — за кратамі яна правяла год.

Увосень КДБ унёс Пачобута ў пералік «асоб, якія маюць дачыненне да тэрарыстычнай дзейнасці». Праваабаронцы прызналі журналіста палітычным зняволеным.

Напісаць каментар

Таксама сачыце за акаўнтамі Charter97.org у сацыяльных сетках