Пуціна ўвабралі

Ордэр МКС знайшоў свайго "героя".

У палітычнай сістэме Расеі, якая больш за год таму практычна супакоілася ў вечнай мерзлаце, становіцца горача. Воленс-ноленс кіроўнай групоўцы трэба паказваць сваю жыццяздольнасць. Асабліва пільна згаданая праблема стаіць перад прэзідэнтам Пуціным. У «вечнага стырніка» паводле Канстытуцыі РФ застаўся адзін законны год на пасадзе. Далей ён робіць крок у абсалютную невядомасць. Якім бы ні быў вынік прэзідэнцкіх выбараў 2024 года, дзейнага лідэра будуць успрымаць у Крамлі як самазванца, нават калі Памфілава забяспечыць яму перамогу са 100%-й падтрымкай. Пуцін перастане быць гарантам кансалідацыі эліт, спарадзіўшы самім фактам сваёй кансэрвацыі на пасадзе магутную турбулентнасць. А на вонкавым контуры львіная доля міжнароднай супольнасці канчаткова спальвае масты для ўзаемадзеяння з расейскім прэзідэнтам.

Вельмі сымбалічна, што роўна за год да дня галасавання Міжнародны крымінальны суд выдаў ордэр на арышт Пуціна. Яму інкрымінуюць датычнасць да ўчынення ваенных злачынстваў: правядзенні незаконнай дэпартацыі дзяцей з часова акупаваных тэрыторый Украіны. Суполка юрыстаў Кірыенкі ды Брычовай перад пачаткам уварвання ва Украіну пераконвалі Пуціна, што ён мае жалезабетонны імунітэт. Расея не прызнае МКС, для яе яго рашэнні - проста паперкі. Калі за ваенныя злачынствы каго і будуць судзіць у выпадку краху, то гэта будуць расейскія выканаўцы, якія выжылі, ад шараговых да генералаў. Як варыянт для выдачы планаваліся кіраўнікі ПВК накшталт Прыгожына, якія бяруць удзел у баях у самым уразлівым для міжнароднага правасуддзя статусе «наймітаў».

Але людзі Кірыенкі не ўсе здолелі ўлічыць - Пуціна схапілі на незаконнай дэпартацыі дзяцей, якіх без згоды бацькоў і органаў апекі прымусова вывозілі на расейскую тэрыторыю. Асабліва працэс інтэнсіфікаваўся пасля травеньскага ўказа Пуціна аб спрашчэнні надання расейскага грамадзянства ўкраінскім дзецям-сіротам. Гэтым чынам узаконілі выкраданне сотняў тысяч дзяцей. Дэпартацыя падавалася, як выратаванне дзіцячых жыццяў. Склалася ўражанне, што Пуцін капіюе ў дробных дэталях ліберыйскага дыктатара Чарльза Тэйлара. Той наогул выкарыстоўваў дзяцей як жаўнераў, а ягоным перадвыбарным лозунгам стала: "Чарльз Тэйлар забіў майго бацьку, забіў маю матку, але ўсё адно я прагаласую за яго". Пасля страты ўлады Тэйлар сеў на лаву падсудных у Гаазе і быў асуджаны на турэмны тэрмін 50 гадоў за кратамі. Такая ж доля замаячыла перад Пуціным. Пасля выдачы ордэру МКС Інтэрпол мае права затрымаць ваеннага злачынцу ў 137 краінах-падпісантах Рымскага статуту.

Хоць займець кіраўніка ядзернай дзяржавы ў рукі правасуддзя будзе заданнем з зорачкай, але яна выканальная. Пасля ордэру МКС кантакты з Пуціным стануць таксічнымі для ўсякіх замежных лідэраў. Ціснуць руку заразнаму - самому распісацца ў суўдзеле ў злачыннай дзейнасці. Замежная палітыка Масквы ўпадае ў стан паралюшу. Вельмі паказальным стане візіт кітайскага кіраўніка Сі Цзіньпіна ў Расею. Гэта поўны джэк-пот для Пекіна, цяпер ён можа афіцыйна ўзяць Расею пад абсалютны кантроль. Калі даўней пуцінцы за капейкі аддавалі кітайцам расейскія прыродныя рэсурсы, то цяпер Сі гатовы прызначыць свайго міністра-рэзідэнта ў Крэмль кіраваць Расеяй пры захаванні пуцінскай абалонкі.

Пасля ўсведамлення здарэння ў Пуціна так падскочыў адрэналін, што ён памкнуўся з неабвешчаным візітам на акупаваныя тэрыторыі. У Севастопалі агледзеў дзіцячы лагер "Артэк". Потым пад сховам ночы пракраўся на гелікаптэры на папялішчы Марыюпалю і правёў пастановачную сустрэчу з акторамі з пабудаванага, але пустога пяціпавярховіка ў мікрараёне «Неўскім». Там Пуцін у мехаватым пухавіку глядзеўся сюррэалістычна. Яму расказвалі пра жыццё ў «маленькім кавалачку раю» ў апраметным марыюпальскім Тартары. Чым не мадэль усёй Расеі: ласка для абраных, цемра апраметная ўсім астатнім.

Telegram-канал "Сіта Сакрата"