Палітычны вязень Міхаіл Зубкоў абвясціў сухую галадоўку
2- 29.03.2023, 12:04
- 5,492
Надоечы ў гэтай калоніі выкінуўся з акна іншы асуджаны.
Экстрадаваны з Расеі Міхаіл Зубкоў, які адбывае пакаранне ў папраўчай калоніі № 14 у Навасадах пад Барысавам, абвясціў сухую галадоўку. Пра гэта паведамляе «Радыё Свабода» са спасылкай на дакладныя крыніцы.
- Яго чарговы раз змясцілі ў штрафны ізалятар без дай прычыны. Міхась адбыў сем дзён у штрафным ізалятары за тое, што «не так прадставіўся» канвойнаму. Ён выйшаў з ізалятара 21 сакавіка. Праз тры дні яго зноў пакаралі штрафным ізалятарам на 10 дзён - толькі за тое, што ён запатрабаваў сустрэчы з натарыюсам для развязання нейкіх сваіх праблем, - сказаў суразмоўца выдання.
Са слоў крыніцы, Міхаіл абвясціў сухую галадоўку на знак пратэсту супраць ягонага незаконнага змяшчэння ў штрафны ізалятар.
Гомельца Міхаіла Зубкова прысудзілі да трох гадоў калоніі за "гвалт над трыма амонаўцамі". Перад гэтым яго затрымалі ў Расеі і экстрадавалі ў Беларусь, нягледзячы на забарону Еўрапейскага суда правоў чалавека.
Нагадаем, напярэдадні праваабаронцы паведамілі, што ў той жа калоніі ў Навасадах 26 сакавіка яшчэ адзін асуджаны паводле «палітычнага» артыкулу выкінуўся з акна другога паверха праз жорсткае абыходжання са зняволенымі. Цяпер ён знаходзіцца ў шпіталі Барысава, ён мае праблемы з хрыбтом.
У гэтай калоніі, зазначае «Вясна», адбываюць пакаранне пяць чалавек, прызнаных палітычнымі вязнямі, у тым ліку актывіст, грамадскі дзеяч Зміцер Дашкевіч.