У кожным трэцім рэгіёне Расеі зафіксавалі астатнюю стадыю эпідэміі ВІЧ

Лідэрамі ў тэмпах распаўсюджвання ВІЧ застаюцца Сібір і Урал.

У траціне рэгіёнаў Расеі выявілі астатнюю стадыю эпідэміі віруса імунадэфіцыту чалавека (ВІЧ), пішуць "Важные истории" са спасылкай на кіраўніка навукова-даследчага аддзела эпідэміялогіі і прафілактыкі СНІД ЦНДІ эпідэміялогіі Расспажыўнагляду Вадзіма Пакроўскага, паведамляе The Moscow Times.

Існуюць тры стадыі эпідэміі. Першая (пачатковая) - гэта адзінкавыя выпадкі, другая (канцэнтраваная) - калі заражана больш за 5% якога-небудзь кантынгенту (напрыклад, зняволеных, нарказалежных або ўцягнутых у прастытуцыю), а трэцяя (генералізаваная) стадыя - калі ВІЧ заражаныя больш за 1% цяжарных.

Са слоў Пакроўскага, у 9 расейскіх рэгіёнах першая стадыя эпідэміі, у 48 - канцэнтраваная, у 27 - генералізаваная. Лідэрамі ў тэмпах распаўсюджвання ВІЧ застаюцца Сібір і Урал: Краснаярскі і Пермскі край, Арэнбуржская, Кемераўская, Іркуцкая, Томская, Чалябінская, Новасібірская, Курганская, Свярдлоўская вобласці. Так, у Іркуцкай вобласці ВІЧ выяўляецца ў 2,6% цяжарных.

Таксама, паводле ацэнак акадэміка, вірусам заражаныя 10% расейскіх зняволеных. Яшчэ адзін высокі паказчык - 4% - сярод мужчын старэйшых за 40 гадоў.

Пакроўскі падаў звесткі за 2022 год, паводле якіх у краіне жывуць 1,198 млн чалавек з пацверджаным дыягназам ВІЧ. На думку акадэміка, да іх трэба дадаць яшчэ блізу 300 тысяч чалавек, якія жывуць з гэтым захворваннем, але не ведаюць пра гэта, бо не здавалі тэсты. Такім чынам, агулам у Расеі інфікаваныя як мінімум 1,5 мільёна чалавек або 1% насельніцтва.

Пры гэтым Міністэрства аховы здароўя ўлічвае толькі тых, хто стаў на дыспансерны ўлік у СНІД-цэнтрах. Людзей з дадатнымі тэстамі, якія гэтага не зрабілі, у статыстыку не ўключаюць. Іхняя колькасць даходзіць да 20% ад усіх пацверджаных выпадкаў заражэння, адзначае Пакроўскі. Таксама не ўлічваюцца замежныя грамадзяне і ананімныя дадатныя тэсты.

Пакроўскі назваў узровень захворвання на ВІЧ у Расеі высокім. Цяпер прырост складае больш за 60 тысяч чалавек за год. Згодна з дзяржаўнай стратэгіяй супрацьдзеяння распаўсюджванню ВІЧ, да 2030 года чакаецца яшчэ 660 тысяч новых выпадкаў. У гэтым паказчыку Расея выпярэджвае краіны Еўропы ў 3-15 разоў: у Нямеччыне, напрыклад, ВІЧ выяўлены ў 0,1% насельніцтва ў веку 15-49 гадоў, у Італіі - у 0,2%, у Гішпаніі - у 0,4%, а ў Партугаліі - у 0,5%.

За 2021 год Расея ўвайшла ў топ-5 краін у колькасці новых выпадкаў ВІЧ. Паводле звестак UNAIDS (падраздзяленне ААН у пытаннях ВІЧ і СНІД), яе абагналі толькі Паўднёвая Афрыка, Мазамбік, Нігерыя ды Індыя.